كلام ستات

«بطلي زن وما تتحيليش على حد».. رضوى الشربيني لـ«الستات»: 8 مواقف مينفعش تتنازلي فيهم

الخميس 02/سبتمبر/2021 - 07:43 م

عزة ذكي

نصحت الإعلامية رضوى الشربيني، مقدمة برنامج «هي وبس» على قناة "سي بي سي سفرة" السيدات بعدم التنازل في حياتهن خاصة في 8 مواقف حتى يعيشن في آمان، وذلك عبر حلقة البرنامج الخاص بها، حيث أكدت على أن الزوجات لا يجب أن يتحملن فوق طاقتهن أو إعطاء فرصة لمن لا يستحق.

وشرحت "الشربيني" المواقف الـ 8 التي يجب ألا تتنازل فيهم السيدات وهي:

1-متتحمليش فوق طاقتك

قالت "الشربيني": «متتحمليش فوق طاقتك سواء في علاقتك بأصحابك أو بحبيبك أو خطيبك أو حتى أهلك، مينفعش تتحملي نفسك فوق طاقتها مهما كانت الأسباب لأن في الأخر انتي اللي هتتعبي ومش هتلاقي اللي يسندك، من الأخر محدش هينفعك غير نفسك».

2-اللي ميسألش فيكِ متعبريهوش

أضافت رضوى الشربيني: « اللي ميكلمكيش متكلميهوش، واللي ميسألش فيكِ متعبريهوش، واللي كلمتيه مرة ومردش مترجعيش تتصلي بيه تاني، لو انتي مش فارقة معاهم مينفعش يفرقوا معاكي».

3-متديش فرصة تانية لحد مايستاهلش

متديش فرصة تانية لحد مايستاهلش، لأنه يوم لما تدي فرصة تانية لحد لازم تكوني متأكدة إنه يستاهلها، لكن في ناس كدة بتصرفاتها بتقولك انا مستاهلش فرصة تانية، انا استاهل« فرصة سعيدة».

4-مسج واحدة كفاية

نصحت الستات بضرورة البعد عن الإلحاح قائلة: « بطلي زن، مكالمة ورا مكالمة ومسج ورا مسج، إنت فين.. طمني عليك.. يا ابني رد عليا.. لانه طبيعي لو شاف مسج واحدة بس هيرجع يكلمك ولو مشافش يبقى مش هيشوف الباقي، اما بقى لو شاف ونفضلك ده موضوع تاني خالص بقى».

5-متتحايليش على حد

اللي عايزك أو فارقة معاه مش هيستنى تتحايلي عليه أو تطلبي منه اهتمام أو تقدير، بالعكس ده انتي هتلاقيه بيعمل ده وأكتر من نفسه، وعشان كدة مينفعش تتحايلي على حد.

6-متسامحيش اللي غلط في حقك عمداً

كما نصحت السيدات بعدم مسامحة الخطأ فيكي، اللي يغلط في حقك عن قصد أو يعمل حاجة عارف إنها هتضايقك مينفعش تسامحيه أو تقبلي منه أسف لمجرد أنكِ باقية عليه ، وخصوصا لما يكون بيكرر نفس الغلط كل مرة.

7-متتنازليش عن كرامتك مهما حصل

مهما كانت الأسباب، اوعي تتنازلي عن كرامتك أو عزة نفسكن لانك لو معملتيش لنفسك قيمة الكل هيدوس عليك ومحدش هيعملك حساب، سواء صاحب أو حبيب.

8-اللي يخرج من حياتك بمزاجه مترجعيهوش بمزاجك

وأخيرا بقى لازم تاخدي بالك كويس قوي من الجملة دي« أنت مش تحت أمر أي حد يدخل أو يخرج من حياتك في الوقت اللي يحبه، وعشان كدة اللي يخرج من حياتك من غير سبب و بمزاجه لازم ترفضي دخوله حياتك مرة تانية ».

اقرأ أيضًا..