أسعار الخضروات والفاكهة اليوم الجمعة 22-11-2024
اعتمدي على نفسك.. نانسي ماهر توضح خطوات التعافي من الخيانة
الأربعاء 01/سبتمبر/2021 - 07:21 م
عبدالله أبو الخير
قالت الدكتورة نانسي ماهر خبير العلاقات الأسرية ومرحلة المراهقة؛ أن الخيانة مسؤولية الخائن وأن التعافي منها مسؤولية من تمت خيانته وأن عليه مهمة معافاة ذاته.
حيث كتبت في منشور رفعته على الفيس بوك: "الخيانة مسئولية الخائن لكن التعافي مسئولية اللي اتخان"، وبصراحة أي حد يسمعها في الأول ممكن يتخض بس مع التفكير هتلاقيها صح جدا، ومش بس كده، احنا ممكن نعممها، إن الأذى مسئولية المؤذي لكن التعافي مسئولية اللي تعبان، طيب ازاى بقى".
وتابعت الدكتورة نانسي: "يعني ايه مسئولية؟
مسئولية يعني حاجة أنت اللي ملزم بيها لنفعك الشخصي أو نفع حد يخصك وأنت اللي هتدفع ثمن إنها متتعملش
طيب لو طبقناها على الأذى، المؤذي اذاك؟، اه في حالات كتير ممكن نقول أنه يقدر يساعدك تطلع من اللي أنت فيه، بس لو معملش كده أنت مازلت أنت اللي تعبان متضرر مأذي".
وأكملت: "المؤذي ممكن يكون حد طبيعي أذاك غصب عنه أو يكون اللي حصل ده حادثة ، وفي أحيان تانيه بيكون اللي اذى ده شخص غير سوي، ساعتها فكرة اني اعتمد عليه في شفائي النفسي معركة خسرانة".
وأضافت:" التعافي دي رحلة طويلة محتاجة تعب واجتهاد وإصرار ووقت ، ففكرة إنك تلاقي حد بشري يستحملك خلال الرحلة دي مش حاجة دايما متاحة، فمهما كان الشخص اللي قدامك حاسس بالذنب هيجيله وقت ويزهق وخصوصا لو فترة حزنك ووجعك طولت، لو الوقعات او your down moments زادت هياخد الموضوع كمان مش بحيادية زي ما يكون حد متخصص او حد بعيد شويه عن الاحتكاك اليومي بيك مش معاك طول الوقت".
اقرأ أيضًا..
وأردفت: "أحيانا كتير اللي أذاك بيبقي مش مدرك أو مش فاهم أبعاد حزنك ولا تطور حالتك، أنت زعلان منه لسه بالرغم من اعتذاره، وأحيانا يفتكر أنك عاوز تفكره كل شويه بذلته أو بخطئه.
حتى لو مش ده قصدك".
وأنهت: "الخلاصة أن مزيج الألم والمشاعر السلبية زي الغضب الغير مسيطر عليه والحزن الدفين مع مشاعر الوحدة و الخوف أحيانا اللي بتيجي وقت الأذى و الصدمة و الفقد، كلها مشاعر لابد من التعامل معها، ومش دايما الشخص اللي تسبب فيها المحيطين أـو المصادر الغير مدروسة بتساعد فيها حقك على نفسك حتى وقت الأذى تقوم تعافر تحارب عشان تنقذها، ومتسبهاش فريسة للضعف وللانهيار ".
