"جاية مع مين يا حبيبتي؟".. كوميديا البنت القصيرة في الجامعة

الفتيات قصيرات القامة، لهن قصص وروايات "تهلك من الضحك" سواء في حياتنا اليومية داخل الأسرة، أو في اليوم الدراسي، أرواحهن الفكاهية تعطي للحياة طعماً مختلفاً، وخلال السطور التالية نسرد قصة ندى أبو حجر، الطريفة مع أيامها في الجامعة .

قالت ندى: "بالعكس والله ده أحلي حاجة القصيرين دول، أنا أصلا مش حاسة إن أنا قصيرة، بالعكس والله أنا بحب طولي جداً، ولما حد يقولي يا أوزعه أو يا قصيره مش بزعل ولا بتضايق، دا أنا بهزر وأحفل معاهم، وبعدين أنا مش قصيرة لدرجة إنى حاسة إن كل أصحابى طوال ، كمية اصحاب طوال والله بمشي كأني بنت اخته".

وتابعت: "مره وأنا في الجامعة واحد بيقيس لوحه متر ونص جه قاسها عليا علشان مكنش معاه حاجه يقيس بيها ومره وأنا داخلة الجامعة مكنش معايا كارنية الجامعة مرضيش يدخلني بيقولي إنتي جاية مع مين يا حبيبتي.. بقوله أنا لسه سنة أولي ونسيت الكارنية لغايه ما كلمت صحابي علشان يجوا يدخلوني".

وأردفت: طبعاً مش كل الناس بتتقبل الهزار ومش أى وقت ينفع فيه الهزار يعني لازم نراعي مشاعر بعض دايماً ونفرق بين إننا نهزر مع اللي قدامنا وبين إننا نضايقه سواء بأفعال أو بكلام أو بتصرفات ورسالة للبنت القصيرة إلي حابين نقولها أنتي جميلة زي ما أنتي".