مقالات

آية شعراوي تكتب: طبخين صراع إيه على الغدا النهاردة

الخميس 11/مارس/2021 - 10:16 م

معظم الستات بيعيشوا في صراع بسبب ست زيها.. بمعنى تانى أحنا الستات بنعًيش بعض في صراعات بقول معظمنا لأن اكيد مش كلنا.. يا عايشه صراع مع واحده كانت صحبتها ومبقتش يا مع بنت خالتها ولا بنت عمها يا حماتها او الحماه مع مرات ابنها او مع اخت جوزها او مرات اخوها او جارتها يا زميلتها فى الشغل المهم يبقي فى واحده تانيه فى حياتنا مكدره علينا عيشتنا..

واشكال الصراع كتيره ومختلفه واحداث مبتنتهيش بس فى الغالب بيندرج كله تحت بند الغيره والفراغ وأننا معندناش كستات ثقافة تكبير الدماغ بنستصعبها وبنستسهل اننا ندخل فى صراع رغم ان الصراع مرهق جدا وخسايره كتيره صحيا ونفسيا وماديا كمان ..

ااه احنا ممكن بسبب صراع مع واحده نخسر فلوس كتير بطرق كتيره ده غير شحنة الكراهيه اللي بتبقي جوانا اللى اكيد بتنعكس بطريقة غير مباشرة على تصرفتنا وطريقة تفكيرنا ونظرتنا لامور كتير.

ونكبر دماغنا ليه لما ممكن نعكنن على نفسنا واحط مرات ابنى فى دماغى ولا ادخل في حرب نفسيه مع مرات اخو جوزى ، احنا دايما بنقول مجتمع ذكورى وان الراجل بيتعس المرأه رغم ان احنا بينا وبين بعض كستات مصعبنها على نفسنا اوي ..

دا انتى حتى هتلاقي كل الاسئلة الرخمه بتاعة مش هنفرح بيكي ومفيش حاجه في السكه وكل اشكال التطفل اللي بتكدرك من ست زيك ولو بالصدفه لقتيها جايه من الراجل بنقول عليه " عامل زي الستات" وهتلاقي بردو كل اشكال التنمر عليكي وعلى ولادك وجوزك ولبسك عيشتك معظم الوقت من ست .

الست متخلقتش علشان تدخل فى صراعات ده فى ستات حرفيا بتضيع عمرها فى صراع وكراهيه ومنافسه وعداوه بتسحب من طاقتها ووقتها ونفسيتها وفجأه تلاقى العمر جرى بيها ..

يمكن من أصعب الجمل اللى سمعتها فى السياق ده واحده بتقول "انا ضاع عمرى في مشاكلى مع اهل جوزى" اه ضيعت عمرها فى اللاشيء فى العدم فى اللا افاده ..

عارفه ان فى التي بتجبرك انك تدخلى فى صراع وفى اللى بتفتعل المشاكل وتجرك فيها وانتى متحركتيش من مكانك بس عارفه بردو انك عندك حرية الاختيار وعندك اوبشن التجاهل وعندك سياسه اسمها وقف اللى قدامك عند حده وانك متخليش حد يشدك لصراع لانه هياخدك وينزل لتحت وعمرك ما هتعملى اى انجاز ولو عملتى هتلاقي الصراع بيشتت انتباهك عن الفرحه والاستمتاع ..

مفيش ست فى صراع ومرتاحه حتى لو هى اللى منتصره فيه بالمعنى المتعارف عليه بينا لانك حتى لو منتصره ف انتى خسرانه بكل المقاييس حاجات كتير اولها علاقتك بربنا لان الصراع ده تشكيلة ذنوب انتى قايمه ونايمه بيها .

كنت قاعده فى الكيدز اريا مستنيه اطفال العيله خدت بالى كل شويه تجيلى طفله معرفهاش تشتكيلى من حاجه مره واحده تقولى يا طنط اللى هناك دي ضربتنى مره تانيه ميس اللى هناك دى شدتنى من شعرى تعالى اورهالك وكل شويه واحده تيجي بشكوي فى حين ان الولاد عاجنين بعض حرفيا ضرب ولعب ورايحين جاين يدوسوا علي بعض وكل حاجه ومش مركزين غير فى انهم بيلعبوا حسيت اننا كستات منذ الطفوله عندنا مشكله فى الاستمتاع وبنصعبها على نفسنا ومش عارفين نبقي ابطال العالم فى تكبير الدماغ زى الرجاله .

ده مش علشان احنا كستات وحشين لا خالص ده يمكن من فرط مشاعرنا واحاسسنا مش بنبسط الامور وبنعديها بس الاكيد اننا محتاجين نعمل وقفه مع نفسنا ولو كنا فعلا واقعين فى فخ الصراع نخرج منه ونستمتع بحياتنا وننجز اكتر وننجح اكتر ونوفر طاقتنا احنا اولى بيها.

طبعا لو انتى من الناس اللى شاريه دماغك ومكبره وعارفه ان صحتك ونفسك واللى بتحبيهم اولى بالاهتمام والمجهود وباعده نفسك عن الصراعات والدوشه ف بحييكي على قوة شخصيتك لانك اختارتى الاصعب ونفذتيه واستمتعى بالسلام النفسي اللى هو نعمه كبيره بالمناسبه