بقلم عبدالهادى البهبشينى: بنات بتاكلها بالحلال.. سند لآبائهن في زمن صعب

في زمن غابت فيه القيم عند بعض الناس، وفي الوقت اللي بقينا نشوف فيه نماذج لبنات وسيدات اختاروا طريق التسول أو الانحراف على منصات زي تيك توك والسوشيال ميديا، بنلاقي بنات محترمة بتضرب أروع الأمثلة في الكفاح والشرف.

بنات بسيطة، بتخرج كل يوم من بيوتها مع طلعة النهار، رايحة المزارع والحقول تشتغل بشرف، بـ 100 جنيه يومية، تساعد بيها أبوها وأمها في مصاريف البيت. البنات دي رغم إنها متفوقة دراسياً، ومعاها شهادات، لكنها ما استكترتش تعبها ولا خجلت من شغلها. بالعكس، شافت في الشغل ده ستر وكرامة، وأكل عيش بالحلال.

اللي زي البنات دي يستحقوا التحية والاحترام، لأنهم نموذج حقيقي للفتاة المصرية الأصيلة اللي بتقف جنب أسرتها، وبتتحدى الظروف القاسية عشان تعيش بعرق جبينها، مش عشان تتاجر بجمالها ولا تتسول على أبواب الغير.

تحية كبيرة لكل بنت بتشتغل بكرامتها، ولكل أب راضي ومفتخر ببنته اللي شايلة معاه هموم الدنيا.