بنات

أصدقاء السوء وعقوق الوالدين: «أمي تعاملني بطريقة صعبة وفكرت أرفع قضية».. ما الحل؟

الجمعة 02/أغسطس/2024 - 10:22 م

مشكلة فتاة وأمها عبر مواقع التواصل الاجتماعي

ضحى نبيل

انتشرت واحدة من المشكلات الصادمة عبر مواقع التواصل الاجتماعي في أحد مجموعات الفتيات والنساء على منصة التواصل الاجتماعي الشهيرة "فيسبوك"، وهي مشكلة تتعلق بفتاة وسوء معاملة والدتها لها، ولكن الأصعب كان حل صديقات الفتاة أنها لابد أن ترفع دعوى قضائية ضد والدتها، وسرعان ما تهالت التعليقات المهاجمة والتعليقات التي تحتوي على نصيحة عبر مواقع التواصل الاجتماعي لحل المشكلة بين الأم والفتاة.

مشكلة فتاة وأمها تتصدر مواقع التواصل الاجتماعي

وسردت فتاة امتنعت عن قول اسمها عبر إحدى المجموعات المتواجدة عبر مواقع التواصل الاجتماعي، قصتها مع والدتها، حيث بدأت الحكاية بكلمات قليلة قائلة: "أنا عايشة مع ماما وبتعاملني وحىش جدا صحابي قالولي ارفع عليها قضية بس أنا مش هاين عليا، من صغري بتعاملني بشكل صعب، يعني زعيق على طول وخناق مفيش حنان ولا حضن ولا جو الأمهات ده، ده خلاني ضعيفة الشخصية لحد ما كبرت، ومعنديش ثقة في نفسي وشايفة نفسي وحشة وكلام من ده كتير".

وتابعت الفتاة مشكلتها عبر مواقع التواصل الاجتماعي: "كبرت وأمي ما زالت بتعاملني وحش هي طيبة، بس هي مبتجيش غير عليا أنا، من الحاجات اللي بتأثر فيا لما يحصل أي مشكلة بتقولي أن صلاتي وقرآن مش هيتقبل وإني منافقة وربنا يعلم اللي جوايا، أنا عندي فقد حنان وبحتاج حد يطبطب عليا ويسأل والحاجات اللي هي بتعملها الأمهات دي بس انا ملقتش ده ف أمي أنا بروح أقولها عاوزة حضن تقولي ابعدي عني".

واختتمت الفتاة مشكلتها عبر مواقع التواصل الاجتماعي: "أنا خايفة أكون كده مش بطيعها وإني كده يعتبر عاقة بس أنا مش عارفة أعمل إيه مع أن ربنا يعلم محدش بيريحها في اخواتي غيري وعلى كلامها هي بس انا غصب عني اتأذيت غصب عني وبسببها بقيت ضعيفة".

رد فعل مواقع التواصل على مشكلة فتاة وأمها

وضجت مواقع التواصل الاجتماعي بعدد من التعليقات على مشكلة فتاة وأمها، حيث كتبت روزالين أحمد: "حاولي تتكلمي معاها لو مستجابتش تجاهليها، بس بلاش قضية"، وردت علا هاني: "هتندمي، حاولي تقربي منها وكلميها بالراحة".

بينما كتبت أميرة حسن تعليق عبر مواقع التواصل الاجتماعي: لو الموضوع كبير يا حبيبتي، شوفي خالك أو عمك بس ميكونش حد هيشمت فيكي أنتي وأهلك وبإذن الله تتحل ساعات الأهل بتبقى خايفة على عيالها بس بطريقة غلط دي أمك يا حبيبتي، وربنا يصلح حالك وحالها متسمعيش لحد".

فيما نصحت فطيمة يوسف: "لا طبعا قضية إيه بس، بصي أنا حاسة بيكي والله لأني مريت بده كتير بس حقيقي ربنا هيحاسبك أنتي مهما كانت وحشة وبتعاملك بقسوة فهي مازالت أم برضو سمعت قبل كدة شيخ بيقول اعصي الأم في حالة واحدة لو قالتلك أعوذ بالله انك تكفري غير كدة ف انتي تشيليها في عينيك، بصي مع الوقت هتتأقلمي وتتعودي وهيجي عليكي وقت هتعاملك حلو هتتحولي لطفلة وتتعلقي بالحنية دي وبعدين هتتقلب تاني بس والله ربنا هيعوضك وان شاء الله يرزقك ببنوته تعوضك وتكوني خير الأم ليها".