بسمة وهبة: اشتروا ربع كيلو لحمة «ماتتكسفوش» وتجار المواشي كذابين

أعربت الإعلامية بسمه وهبة عن استيائها من الارتفاع المبالغ به في أسعار اللحوم والأضاحي مشيرة إلى أن كثير من المواطنين لن يستطيعوا شراء اللحوم والأضاحي هذا العام.

وقالت بسمه وهبة، خلال برنامجها "90 دقيقة": "عيد الأضحى بعد أيام وربنا يعيده علينا بالخير والبركة، وبثقافتنا كمصريين هو عيد اللحمة وكل الناس فيه بتتسابق عشان تضحي، ومش بس عشان السبب الديني بس عشان تدبح وتهادي بعض وتتصدق، وفيه ناس حرفيًا ومش ببالغ مبتعرفش طعم للحمة غير من العيد للعيد والكل بيتسابق في الخير، وخير عيد الأضحى هو خير الأضاحي".

وتابعت بسمة وهبة حديثها: "بس للأسف السنة دي الوضع غير وبقى واضح كده ارتفاع أسعار اللحمة وفيه ناس مش هتقدر تضحي، مش هنقدر ننكر إن إحساس صعب على الناس اللي متعودة تدبح في العيد واللي في القرى والشوارع المحتاجة أنها تستنى عشان يدخل بيته 2 أو 3 كيلو لحمة من أهل الخير".

كما اشعلت بسمة وهبة نيران غضبها ضد التجار الذين يتلاعبون بالأسعار قائلة: "عايزة أقول منهم لله.. اللي هما كل تاجر جشع كل صاحب مزرعة مش بيراعي ضميره، كل تجار أزمات الأعلاف وكل اللي لعبوا في سوق اللحمة وتسببوا في ارتفاع أسعار الأضاحي 3 أضعاف السنة اللي فاتت.. سرقوا فرحة الناس الغلابة بعيد اللحمة لأن المضاربات اللي عملوها وجشعهم اتسبب في رفع أسعار اللحمة بالشكل ده عارفة أن الأسعار غالية".

واختتمت بسمة وهبة هجومها باستنكار تسبب العلف والدولار في زيادة الأسعار قائلة: "متقولوش العلف والدولار أنتم بتقعدوا تسمنوا في الخروف بتاعك وتحط له ملح في العلف ويوزن وتضحك على الزبون يا غشاشين يا كدابين".