«هير نيوز» تنشر قصص ستات بـ100 ست.. الأسطى أم فارس الكهربائية سند زوجها في أزمته

دائما نسمع عن تضحيات المرأة من أجل أطفالها، وهناك الكثير من القصص التي تروي كفاح سيدات خرجن للعمل الصعب والشاق من أجل توفير لقمة العيش لأسرتها، هذا هو حالة المرأة المعيلة في مصر، وما أكثرهن، حيث لا تتسع هذه السطور لمنحهن حقهن وتكريمهن على هذا الدور العظيم.

تقول نور: "كنت عايشه زي أي ست بخدم بيتي وزوجي وكانت حياتنا سعيدة وزي الفل، وعمري ما اتخيلت إن الدنيا تتقلب مرة واحدة 180 درجة، وألاقي نفسي أمام مسؤوليه ولازم اتحملها لوحدى
وهي لما جوزى اتصاب وجتله جلطة وتدهورت حالته الصحية، وفقد القدرة على العمل مبيحركش إيده".

وأضافت: "كان لازم أشيل المسؤولية علشان قوت يومنا هو وأنا وأولانا، ونزلت بالفعل أدور على شغل ولقيت شغل في حضانة، وكان معايا أولادي، ولكن المرتب لم يكن كافيًا للأسف بس قلت أصبر لغاية ما ألاقي شغل تاني".

وتابعت: "لقيت فرصة عمل في مستشفى كممرضة، وبعد فترة سبت الشغل علشان معرفتش أوفق بين الشغل وبين بيتي، لأني بقضي مدة طويلة من الوقت بالشغل ووولادي صغيرين مش عارفة كنت أسيبهم مدة طويلة أوي مع والدهم وهو نفسه محتاج لرعاية، باختصار بسيط أنا عايزة شغل مش كل يوم يجيب فلوس تكفينا".

وواصلت نور: "تعبت من كتر التفكير، وفي يوم بتكلم مع جارتي على تعب الحياة عرضت علي فكرة إن أنزل مكان جوزي في مجال الكهرباء، الصراحة استغربت ورديت وقلت لها ما أقدرش أنزل الناس هتقول عليا إيه، ومين هيقتنع بواحدة ست كهربائية".

وأكملت: "لكنها اقتنعتني وأخذت كلامها بجد وبالفعل بدأت أبلغ كل اللي يعرفني إني بشتغل في مجال الكهرباء من تعليق الستائر والنجف والسبوتات والمراوح وتأسيس الشقق من الألف للياء، ومن هنا بدأت وبقيت شغالة بالهيلتي والصاروخ زي أي راجل في مجال الكهرباء".

وزادت: "بدأت اشتغل شغلانة الغلطة فيها بموتة، ما فيهاش هزار وهي كهربائي سيليسيون عشان خاطر عيالي وجوزي.. مشواري من مكان لمكان عرفتني ببعض الناس، من هنا أطلقوا علي لقب الأسطى أم  فارس الكهربائية، عايزين تعرفوا تعلمت إزاي الكهرباء؟؟؟".

وقالت نور: "أنا كنت بتعلم من جوزي شوية حاجات علشان أعملها في البيت لو هو مش موجود علشان متقلش عليه الحمل لما يرجع من الشغل يرتاح، وكأن ربنا سبحانه وتعالى من عليا بالفكرة دي علشان بعد كده هو عالم الغيب سبحانه وتعالى".

وأضافت: "كنت بروح أحيانا معاه وهو بيشطب أكثر من شقة من باب الونس وكان معايا بنتي الصغيرة نقعد معاه لغاية ما يخلص ونرجع للبيت، كان ديما يقولي كلمة كانت بتوجع قلبي، يقولي اتعلمي مهنة تنفعك لو جرالي حاجة عشان منتحوجش لحد وكأن قلبه كان حاسس".


وواصلت: "كتير نصحوني أدور على شغل تاني لخطورة الشغلة دي، وكمان للأسف أحيانا بتعرض لمضايقات بس هو ده الشغل اللي أنا عارفاه واتعلمته من جوزي".

وأكملت: "رغم كل ده بتفضل ابتسامتي قدام جوزي وولادي وبدعي ربنا يعينني على المسئولية دي،
عارفين رغم كل شيء يهون في سبيل نظرة حب من أولادي وجوزي أول ما برجع البيت، وكل مرة كنت أنزل فيها الشغل أقول يارب استرها عشان أرجع لعيالي ولجوزي.. وهو حاليا يخضع للعلاج الطبيعي".

وزادت: "أسعى إنى أعمله معاش ودايخة في الموضوع ده.. نفسي يكون عندى كشك صغير أبيع فيه أدوات كهربائية.. أنا كنت مقدمة من 5 سنوات على شقة بالإسكان لأننا عايشين بشقة إيجار وموضوع الإيجار حالياً أرهقنى جدااا وكنت دافعة كل حاجة بس متوقفة على الاستلام، لازم أدفع مبلغ 40 ألف جنيه وحاليًا أنا معنديش المقدرة لدفعها".

ووجهت رسالة للرئيس عبدالفتاح السيسي قائلة: "أنا نفسي لو سيادة الرئيس يسمع صوتي أنا كل حلمي أستلم الشقة وأنا أدفع أقساطها، أنا مش عاوزة مساعدة من حد، أنا نفسي بس أعيش أنا وجوزي وولادي حياة كريمة".

واختتمت: "أحب اوجه كلمة لجوزي وولادي، ربنا يخليكم ليا، وتكبروا وتبقوا سندي أنا ووالدكم.. وبرضه  بشكر كل اللي دعمني بالحب والثقة والدعوة الحلوة".

ولأن مدام نور ست بـ١٠٠ست، ولأنك بطلة في حياة زوجك وأبنائك، تم اختيار قصتك، ونتشرف بتكريم حضرتك ضمن ٣٠ أم معيلة بطلات في حياة أبنائهم، فى احتفالية السنة السادسة بيوم المرأة المعيلة.