البلوجر نورهان قنديل تثير جدلًا واسعًا عبر السوشيال ميديا.. عقب إعلانها خلع الحجاب

صدمت البلوجر نورهان قنديل جمهورها في الساعات القليلة الماضية عقب إعلانها عن خلعها للحجاب، وذلك عبر حسابها الرسمي على موقع التواصل الاجتماعي" انستجرام "

فنشرت الدكتور نورهان قنديل منشور تعلن فيه عن خلعها للحجاب وحزنها الشديد لاتخاذ هذا القرار كاتبةً "مش عارفة ليه كل ده حصلي.. بس أنا في ابتلاء شديد ومعنديش تفسير ولا تبرير بس أنا كنت بمر بمرحلة حزن وضعف شديدة من قبل لبسي للحجاب وقلبي وكل حاجة فيه كانت بتحركني ناحية الخطوة دي علشان ابقى أقوى لنفسي ولبناتي وشغلي، وربنا وحده بس هو اللي عالم ضميري ونيتي.. بس النتيجة إني بقيت أضعف بكتير والخطوة دي بقت محتاجة مني قوة مش عندي".

واستكملت كلامها: "أنا أكيد حزينة إني مقدرتش أكمل في حاجة بحلم بيها من سنين وبدعي ربنا كل يوم إنه يختم حياتي بيها وبدعي ربنا من قلبي يحببني في نفسي في الحجاب الصحيح اللي مقدرتش أعمله، وحزينة أكتر إني بعلن ضعفي وتشوشي واضطرابي اللي غلبني وسيطر عليَّ ومش عارفة موصلنى لفين.. وآسفة طبعا طبعا آسفة إني دخلتكوا معايا في متاهة قرار شخصي بس هو لأنه حاجة الواحد لازم يكون فخور بإنه يعلنها.. الحجاب ملهوش أي دعوة بأي توتر أنا بعيشه".

واسترسلت حديثها: "بالعكس أنا عارفة إني أجمل بكتير وأنا لابساه…بس في فرق كبير بين إني أتخلى عنه وبين إني مش عارفة ألبسه بالشكل اللي يخليني قوية وواثقة وقد المسئولية…أو ده التفكير اللي للأسف بقى مسيطر عليَّ واتخلل لقلبي".

وعبرت عن استيائها بسبب كونها شخصية عامة قائلة ً " مش هحمل الناس طبعا مسئولية حاجة…بس انا حاسة انى بمر بأزمة كبيرة و اكيد كل حاجة خير و ده يقينى بربنا.بس اللى اتكشفلى فى الفترة البسيطة دى كان اكتر من تحملى و لأول مرة اركز فى حجم القسوة اللى فى القلوب….مش عارفة ليه بس اظن لعنة السوشيال ميديا اصابت قلبى وبقيت حاسة انه مش قادرة على كمية الصراعات اللى بعيشها بسببها ولا مبسوطة بأنى شخصية عامة".

وأوضحت أنها متقبلة كل أنواع الهجوم الذي ستأتيها بعد هذا القرار قائلة: " نا هعتبر كل اللى هيحصل من هجوم طبعا ده فى ميزان حسناتى لانى اكيد محتاجة ده، بس يا جماعة وربنا وحده فقط يعلم، انا لا ولن اسعى فى يوم لإرضاء احد، اكيد سعيت بكل حب و قلب انى اسيب بصمة ونفع واثر طيب لبناتى ولكل اللى بيحبنى وربنا وفقنى واكرمنى جدا…ربنا وحده عالم انا بعيش ايه وهو وبس اللى يهمنى…وبعده امى وجوزى وبناتى وشغلى اللى تعبت فيه جدا".

وتابعت حديثها: "على فكرة انا اجتماعيا و شخصيا فشلت كتير يمكن ده اول فشل يكون معلن بالتفاصيل لكن قولتلكم كتير انا وقعت وقمت وهفضل اعافر بس بتعلم… واظن اخدت درس يسمحلى اقول ان اى حد هيتدخل فى حياتى الشخصية او قراراتى انا هعرضه لمسائلة قانونية لأنى مش معنى انى شخصية عامة يبقى انا مستباحة…انا ام وزوجة وشخص بيصارع ضغوط الحياة كل يوم زى اى حد".

واختتمت نورهان حديثها قائلةً: "أنا متقبلة الهجوم أو إلغاء المتابعات بصدر رحب جدااا بس الاحترام مش اختيار، وعندى يقين إن ربنا هيلهمنى الصواب ومش هيسبنى وهيقوينى ويسامحنى لأنه أرحم بيه من نفسى."

وما أن نشرت البلوجر نورهان هذا المنشور حتي لاقي تفاعلاً كبيراً من رواد مواقع التواصل الاجتماعي الذين اختلفوا بين مؤيد ومعارض لقرارها فجاءت أغلب التعليقات علي النحو التالي:  "مش اقتناع ولا غيره هي ملحقتش ده لزوم التريند".

 

وتعليق آخر: "سبحان الله الي لفت نظري انها دايما بتقول قدي تعبت و كافحت لتحقق حلمها و توصل للي هي في يعني علشان أحلام و طموح الدنيا كافحت و تعبت كتير و تحملت بس شي علشان ربنا و دينها ما قدرت تتحمل تكمل حتى شهر !! ربنا لا تزع قلوبنا بعد إذ هديتنا".

وآخر: "انتي حلوه في كل حالاتك وربنا عالم بما انتي فيه وبما ف قلبك، وأنا متأكده ان ربنا رحيم واكيد اكيد اكيد له حكمه في كل حاجه ، إن شاء الله ربنا يكتبلك الخير حيث كان ويرضيكي بيه ويحسن خاتمتنا جميعا "، وتعليق "حلو اوي هجرب الحجاب يومين مشي معايا تمام ما مشيش عادي اللي اتلبس يتقلع واطلع اقول مبرر والناس بتقبل اي حاجة يا دكتورة انت حد المفروض انه من الشخصيات العامة وقدوة لبنات كتير واقسملك بالله ان في بنات اتخذتك قدوة ولبست الحجاب وعملت زيك فباذن الله انت هتاخدي ثواب وتؤجري على اتباعهم ليكي..

لكن دلوقتي الخوف ان بنات تانية تقلدك ، ربنا يهديكي ويهدينا ويردك اليه رد جميل".