توك شو

أميرة عبد العظيم: متعة المرأة في خدمة الرجل.. وجوزي لازم يبقى "باشا"

الجمعة 14/أكتوبر/2022 - 11:13 ص

الإعلامية أميرة عبدالعظيم

نور احمد

علقت الإعلامية أميرة عبدالعظيم، على "تريند" علاقة المرأة بزوجها والذي أشعل منصات التواصل الاجتماعي خلال الفترة الماضية وذلك بعد حديث أكثر من إعلامية في الأمر مثل ياسمين عز ورضوى الشربيني.

وقالت أميرة عبد العظيم في تصريحات تلفزيونية عبر برنامج "كلام الناس" المذاع عبر فضائية MBC مصر، إنها تسير على الثوابت القديمة وما تعملته من والدتها، حيث تستنكر المطالبات بالحصول على أجر مقابل خدمة الزوج.

وأضافت: "الست لما تتجوز تسيب حريتها على باب البيت، بسمع بعض الآراء بتستفزني كـ ست، زي إن الست من حقها تخرج وتبات برا البيت من غير إذن جوزها، مفيش حاجة اسمها كده، الراجل ميعملش ده، هو في راجل هيخرج ويبات برا من غير ما يقول لـ مراته؟ ده عبث".

وتابعت: "أنا طلعت لقيت أمي بتعامل أبويا بطريقة محترمة جدًا، وأنه يلاقي أحلى حاجة على السفرة، وتقول لنا مش عاوزة أسمع صوت، فبقيت أعمل ده وممكن يقولوا عليا دقة قدمة، لكني بعمل الأصول".

وأردفت: "زوجي له حقوقه وواجباته ومش معنى إني ضعيفة أو أني بتعامل بالثوابت أبقى خاضعة ومستكينة، لكن لو الزوج اللي معاكي سوي وما عندوش عقد، وبيدكي عينه يبقى تاج راسي، وأنا بشوف إن جوزي لازم يكون باشا".

وواصلت: "لما تيجي تقولي كلمة حلوة هرد عليكي كلمة أحسن، مش ممكن عمر الكلمة الحلوة ما تترد بإساءة لو إديتي جوزك كلمة حلوة هتاخدي عينيه".

وعن مطالبات البعض بأخذ أجر مقابل خدمة الزوج، قالت: "مش قادرة أصدق الكلام ده، إزاي تخدم زوجها وتقول له هات مقابل متعة، الست متعتها إنها تخدم زوجها وتحس إنه مسؤول منها وإنه معتمد عليها وإنها بالنسبة له مهمة، لو الست أخدت أجر هتبقى زي اللي بيساعدوا في البيت".

وأردفت: "فين دوري، زي اللي بيقولوا اللي بترضع البيبي عاوزة فلوس، إزاي دي سعادة الأم وحنانها وإحساسها بأنوثتها وكل المشاعر الجميلة لما بترضع البيبي بتاعها دي ثوابت ما حدش يجي جمبها ليه بنسخن الستات".