نشوى مصطفى تروي موقفًا إنسانيًّا لهشام سليم مع فنانة كبيرة

روت الفنانة نشوى مصطفى، موقفًا إنسانيًا للراحل هشام سليم، والذي توفي أمس، بعد صراع مع المرض، عن عمر 62 عامًا.

وكتبت نشوى عبر حسابها على موقع التواصل الاجتماعي "فيس بوك": "افتكرت حاجة عن هشام سليم يمكن مش كتير يعرفوها، في يوم راجعة من التصوير وكان فيه أستاذة ممثلة كبيرة الله يرحمها اسمها ثريا إبراهيم، قالت لي نشوى معنديش عربية توصليني في طريقك لأقرب مكان أنزل آخد تاكسي، قلت لها  تاكسي إزاي هاوصل حضرتك لباب البيت".

وتابعت كلامها: "واحنا ماشيين قالت لي عارفة الشقة اللي حتوصليني ليها دي مين جابهالي — قلت لها مين؟؟  قالت لي شيريهان — وحكت لي إنها كانت بتشتغل معاها مسرحية شارع محمد علي وكانت بتيجي كل يوم من طنطا للقاهرة وترجع تاني لإن بيتها كان هناك، ولما شريهان عرفت قالت لها شوفي الشقة اللي تحبيها وأنا حاشتريهالك، ولما اشترتها كانت فرحانة أوي".

 

وأضافت: "ولما هشام عرف بارك لها وقال لها فرشتيها ولا لسة قالت له فرشتها قال لها كان نفسي أفرشهالك قالت له وهي بتهزر طيب ما تعمل حاجة تانية قال لها تحت أمرك — قالت له نفسي أحج — تاني يوم لقت شركة سياحة بتكلمها وبلغتها إن هشام دفع كامل التكلفة وكانت خمسين ألف جنيه وكمان وهي رايحة عطاها مصروف الرحلة وقال لها ادعي لي بس كده، ألف رحمة ونور".

وكانت نشوى قد نشرت منشورًا آخر أمس عن هشام سليم قالت فيه: "من شوية على إم بى سى حلقة من يحدث فى مصر وكلام عظيم عن قيمة هشام سليم الإنسانية والفنية، اتمنيت وأنا بتفرج إنه يسمع ويشوف بس للأسف، أكيد كان هيفرح أوي".

وأضافت: "أظن أعظم إحساس عند الفنان مهما كانت درجة نجوميته انه يسمع كلمة براڤو —  الله يرحمك يا هشام الله يسعدك ويعوضك ويجعل كل آلامك في ميزان حسناتك ويا رب يجعل الليلة دي أسعد لياليك يارب — ألف رحمة ونور".