علشان تتخانق مع شريك الحياة صح فأنت لازم تحط خطة الأول، مش كل الأوقات اللي بنتخانق فيها بهدف إننا ننكد على بعض، أحيانًا بناخد الخناق سلم علشان نوصل بيه للطرف التاني.

 كتبت الدكتور مايسة كمال إستشاري الصحة النفسية والأسرية عبر الحساب الرسمي لمبادرة "محو الأمية الزوجية " قائلة: "الاتنين اللي بيحبوا بعض بس فقدوا الشغف اللي بيبقى في بداية أي علاقة وراح منهم مع الوقت.. هتلاقيهم من وقت للتاني حد بيتعمد يعمل مشكلة ويكبر الدنيا عشان يتصالحوا من تاني ويرجعلهم جزء من الشغف اللي كان في أول العلاقة".

وأضافت: الزوج اللي من فتره مجبلهاش هدية فبشكل غير واعي تتخانق معاه عشان عارفة إنه لما بيتخانق معاها بيصالحها بهدية، أو بنتخانق بسبب سوء التواصل وكثرة التراكمات.

 

أولى هذه الخطوات: "نتصالح في نفس اليوم".

ويلي ذلك: "اللي غلط في حق التاني يعمل مواقف تزود من رصيده عند الطرف اللي زعله".

وطالبت: "بنتخانق في موضوع ماندخلش في موضوع تاني ونجيب سيرة مواضيع قديمة".

الخطوة الرابعة تتمثل في: "اللي يبدأ يلوم الطرف التاني يسمعه لحد ما يخلص كلامه ويصالحه في الجزء اللي زعله بعدين يبدأ هو كمان يقوله مشكلته".

 

وأضافت: "الطرف اللي أعصابه فلتت التاني يقوله طب نتكلم لما تهدى وبعدها يكلمه ويقوله أنا عايزك تصالحني".

يلي ذلك: "ما تنسوش الفضل بينكم في عز الخناقة".

وقالت في الخطوة السابعة: "ممنوع الغلط بالأهل ولا الغلط أثناء الخناق، نعبر عن زعلنا بعد الخناق بحزن مش برفض".

واختتمت: "بعد ما نتخانق ما نبصش لبعض بقرف ولا نقفل الباب في وش بعض ولا ننزل على الفيس بوستات إساءة.. ولكن نبين إننا زعلانين من اللي حصل وده بيدي للطرف التاني فرصة ييجي يعتذر ويقدر يفتح كلام".