فن وثقافة

تامر حسني: كنت بلعب كورة ومرتبي 22 جنيهًا.. ويوجه رسالة لمتابعيه

الإثنين 15/أغسطس/2022 - 11:07 م

بسمة خالد

وجه الفنان تامر حسني، رسالة للمحبطين واليائسين من الحياة، يحكي لهم عن مشواره الفني والمشاكل التي واجهها قبل دخوله عالم الفن وحتى الآن، كما وجه ونصائح متنوعة لمتابعيه عبر حسابه الرسمي على موقع التواصل الاجتماعي وتبادل الصور والفيديوهات "إنستجرام".

كتب تامر : ""قرأت معظم التعليقات على قد ما قدرت على آخر بوست ليا اللي فوق دا، وفهمت أكتر حاجتين من تعليقاتهم عاملين إحباط لمعظمكم، اليأس من النجاح، وإحباط المقربين".

وتابع: "بعضكم واصل لفقدان الأمل والشغف وبعضكم فاقد الأمل في الحياه نفسها، هطلب طلب منكم قبل أي شيء، افتكروا معاناتي في بدايتي وظروفي الصعبة من غير أب و من غير أي فلوس وبنزل أشتغل في الشوارع من عامل بنزينة لسوبر ماركت، لفواعلي يعني اللي بيبنوا العمارات بطلع طوب وأسمنت عشان ارجع بيتي لأمي الغلبانة بخمسة جنيه بالإضافه لمرتب النادي".

وأضاف: "لما كنت بلعب كوره كان مرتبي 22 جنيها في الشهر منهم بقى تحويشة الميه والكهربا وعمليات أخويا عشان كان عيان لفترة كبيرة كنت بعمل المستحيل فعلاً عشان أمي وأخويا وعشان أوصل لهدفي، كان جوايا سعي دائم لطريقين الكورة والغناء وبقول دا عشان ناس كتير عايز انصحها بالخطوة البديلة عشان لو الحلم مجاش يكون في غيره زي ما أنا كان نفسي أبقى لاعب كورة والكورة مش ليا والأنديه كلها مشوني رغم تفوقي كنت بسأل نفسي ليه الأبواب كلها بتتقفل في وشي، أتاريها بتتقفل عشان توجهني لمسار آخر".

وأردف: "ولما آمنت بكده فهمت قدام إن ربنا كان شايلي الأحسن بس ساعتها مكنتش فاهم، واللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايماً اطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني ف اوعى تقول تعبت عالفاضي".

واختتم: "بالنسبه للمحبطين هيفضلوا موجودين أنت اللي بتسمعلهم وأنت اللي بتسمح إنك تتأثر بيهم، امنع ده فوراً، متبقاش السبب في أذي نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كده بقولك أنت السبب دايماً قول يارب واجتهد وافهم إن الراحة المطلقة في الجنة بس وإحنا على الأرض وربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصعب، ووصلوا يبقى الموضوع فينا، متبقاش أكبر عدو لنفسك، أنت السبب، خد قرار صارم فوراً في التغير والنهوض والنجاح ، والله هتوصل متسمعش غير لقلبك وسلم قلبك للّي خلقه وتوكل على الله".

اقرأ أيضًا..