مشكلة زوجة على سوشيال ميديا: «زوجي رومانسي بزيادة اعمل ايه» والتعليقات: «ده بطر على النعمة»

نشرت إحدى الزوجات مشكلتها على موقع التواصل الاجتماعي "فيس بوك" والتي أثارت الجدل لغرابتها واستنكار الجميع لها، حيث تشكو الزوجة من كثرة الرومانسية والكلام المعسول من زوجها لها.

وكتبت تلك المرأة في منشورها: «السلام عليكم انا ‏مشكلتي ممكن غريبة شوية لكن انا مشكلتي ان زوجي شديد الرومانسيه بشكل مش طبيعي، لدرجة لما بكون عند اهلي بتكسف من مكالماته ليا وبتحرجني جدا قدام اهلي وعاوز يقضي اليوم كله احضان ورومانسية وانا انسانه عمليه مش بحب اضيع وقتي بالكلام ده وكمان بدات أشك أنه كان عنده علاقات سابقة لأن لسانه كله كلام معسول بزياده وبيقول كلام عجيب والله فمستحيل اكون اول واحده يقولي الكلام ده وحفظه امتى طبعا عارفه ان اغلب البنات بتشتكي من قلة الرومانسية مع أزواجهم او خطابهم بس جوزي اوفر بزيادة والله قرف ومش عارفه اعمل معاه ايه واخليه يخف تدريجيا ازاي».

- بطر على النعمة

علقت زينب: «ده إسمه بطر على النعمة بسيطة خالص اتطلقى فى ناس كتير زيك كده مبيحسوش بقيمة الحاجة إلا لما تروح بعدين يندموا».

- تفكير عقارب

وقال سويلم: «سبحان الله لا كده عاجب ولا كده عاجب لا عاجبك رومـانسي ولا قـاسي ولا متلاعب ولا عاجبك الهادي ولا العصـبي ولا المشاغب الراجل شايفك "شمس" وكل الستات كواكب وبيقولك يا ستهم العين ما تعلاش على الحاجب لأ ودي تيجي لازم أنكد وأدور على المتاعب

عجايب! مع إن الرومانسية بتفتت حصوات الحالب رومانسي يعني له تجارب، ده اسمه تفكير عقارب».

كما علقت إيمان: «مش يمكن كان منتظر الحلال علشان كده بيفرغ كل مشاعره معاكي احب اقولك ان حضرتك اللي مشاعرك جامدة اوي او ممكن جدا تكوني مش بتحبيه وده كافي انه اي رومانسية منه تكون مش مقبولة بالنسبة لك».

وقالت دعاء: «حقيقي الإنسان دا كائن عجيب لازم يخلق حاجة تضيقه وتنكد عليه اوفر دوز نكد».

وعلق معتز: «حضرتك مالكيش دعوة اطلاقا بما مضى بعلاقاته قبل الزواج حضرتك هو اختارك ليختذل كل رومانسيته دي مع حضرتك بحلال الله .كون ان حضرتك بوووومه اسمحيلي تبقى مشكلتك مش مشكلته خااااااالص فحضرتك اللى تتعلمي تحتوي زوجك و رومانسيته بدل ما يحتوي غيرك يا فندم».

وقالت غادة: «لا حضرتك متعمليش حاجة هو اللى حيتجوز تانى واحدة يحب فيها ليل نهار بس ياريت مترجعيش تعيطى هنا تانى ربنا يهدى».

وعلق محمد: «وعليكم السلام مش وش نعمه عنده طاقه وبيطلعها معاكي لو هو علي علاقه بحد تاني مكنش هيبقي عنده الوقت يغازل فيكي نكدي عليه ديما وسدي نفسه وهو هيتعدل».