«كتب كتاب على الطبلية».. عروس تخطف قلوب رواد السوشيال ميديا والتعليقات: «البساطة جميلة»

أثارت بعض الصور لكتب كتاب عروس ضجة كبيرة على موقع التواصل الاجتماعي "فيس بوك"، حيث نالت إعجاب الجميع لما عليه من بساطة وجمال للعروس وأسرتها.

وظهرت العروس بفستان أبيض بسيط مع عائلتها ووالدها الذي يعمل فلاحا، كما كانوا يكتبون الكتاب على "الطبلية" وهم يجلسون على الأرض، مما دفع رواد مواقع التواصل التعليق على الصور وبساطتها في ظل انتشار حفلات الزفاف الفاخرة والبزخ فيها، خاصة أن العروس طبيبة والعريس مهندس ولكنهم اختاروا البساطة والاحتفال مع أسرهم دون تفاخر.

وكتب فتحي: «العروسة دى دكتورة بنت فلاح كتبت كتابها على طبلية شوفوا كم الجمال والرقة اللى ربنا نزلهم عليها. شوفوا ابتسامتها الصافية اللى خلت جمالها يزيد ويخطف القلب شوفوا البساطة لاصباع مرفوع ولا أمي ثم أمي ثم اللى خلفوا أهلي ولا قلة أدب شوفوا حضنها لأبوها وفرحتها بيه وهيا قاعدة على الأرض فوق حصيرة وسط أهلها. ماقالتش أنا دكتورة وبريستجى مايسمحش شوفوا نظرتها لعريسها وهما بيكتبوا الكتاب فيها ابتسامة من غير تصنع حاجة تخطف القلب دى اللى لازم. تطلع تريند وكل الناس تدعى لها إن ربنا يرزقها السعادة بقدر ما أسعدت أهلها وأسعدتنا إحنا شخصيا بجمال روحها وأدبها».

وعلق عبد الحفيظ: «إحنا يا فندم إللى بنعمل من الأشكال الضالة تريندات، زى البنت أم صوبع البنت المحترمة اللى فى الصورة هى التريند الحقيقي».

وقالت حياة في تعليق: «بسم الله ماشاء الله... ناس بسيطة وجميلة .. قرش حلال وأولاد عارفة قيمة أهلها ...ربنا يبارك فيهم ويرزقهم بالذرية الصالحة .. اللهم آمين».

كما علقت وفاء: «جميله فعلا أهل طيبين ما شاء الله تربيها واصاله زمان مش موجوده دلوقتى».

وقالت سوزان: «ألف مبروووك الأرض الطيبة لازم نباتها يكون طيب».

وقالت مريم: «الله يديم عليهم السعادة فعلا ، سعادتها ظاهرة لاي حد يشوف الصور ، البساطة جميلة و البسطاء جميلين بقلوبهن».

كما علق حمدي: «الله على البساطة والجمال لوحة متكاملة بتعبر عن بساطة الريف وأصالته وبتفكرنا بالزمن الجميل».

وقالت نازك: «ولاد الاصول الحقيقين والجمال #المصري.. لأن من تواضع لله ..رفعه..وهي بنت اصول لأن المهنة لا تعيب الأصل».

وقال محمود: «البساطة والتعامل بالفتره وانى اعيش عيشت اهلي بدون تصنع أو تكلف كل دى عوامل بتخلى الإنسان سعيد من داخله وده هيفرق فى حياته الأسرية والمهنية والاجتماعية كمان وهتلاقيه غصب عن الواحد بيدخل قلبك بدون استئذان لأنه واقعى وعفوى وده بيدل على الإنسانية والطيبة اللى جواه ربنا يوفقهم فى حياتهم الجديده بإذن الله».