شكوى امرأة: «جوزي خطب واحدة تانية مطلقة».. والتعليقات: « حرب على راجل ميستاهلش»

كتبت امرأة منشورًا على موقع التواصل الاجتماعي "فيس بوك" تعرض فيه مشكلتها وتشكو من زوجها طالبة نصيحة من الأخريات، ولكنها واجهت هجومًا شديدًا وألقى الجميع باللوم عليها.

وقالت المرأة في منشورها: «أنا عايزه أعرض مشكله واحده مع جوزي في الشغل، هي مطلقه ومعها بنت وسمعتها ".."، ولفت علي جوزي وانا اتطلقت مره بسببها، وهو راح خطبها بس طول الوقت ده اه احنا كنا مطلقين بس هو مكنش بيبعد عني انا وابنه طول الوقت. كان بيسال. وعينه تدمع اما يشوفنا. وكان طول الوقت. ييوعدني انه هيسيبها. وهيرجعلي".

وواصلت: " فعلا. فسخ الخطوبه ورجعنا الحمد الله، هي تسكت بقى، لا، قالتله إنت وعدتني وموافقه ابقي زوجه تانيه ولزقه بردو، ومهما هزقتها بتروح تكلمه، وهو طبعا. معجب بالهبل ده، هل امشي واسيبه. وانا معايا ولد وحامل في تاني؟ ولا اصبر. وتاخد وقتها وتمشي؟  انا مش بنام وبكلم معاه مش بوصل لاي حل، الموضوع بقاله سنه ونص انا بجد تعبت».

قالت آية : «انتو التلاتة غلط هو عشان بيجري وراها هو مش طفل و لا هي سحراله دة بمزاجه و هي عشان طبعا اللي بتعمله دة كله ملوش غير اسم واحد و احنا عارفينه، و انتي عشان مش عارفة مستنية ايه من واحد ملوش امان لا و كمان حامل مش عارفة انصحك بأيه بس ربنا يعملك اللي فيه الخير».

وعلقت ماهيتاب: «هي حملت تاني علي أمل إنه يعقل بقي و يحس ان المسئوليه كبرت و بالمرة تفقع التانيه و تفهمها انه بيحب مراته و بيخلف منها و علاقتهم ببعض كويسه.. حرب بين اتنين حريم علي راجل للاسف مايستاهلش.. و هي لو اخذته خالص من مراته شويه و حاتاخد منه خازوق و ف الاخر انتي اللي حاتلبسي العيال دي لوحدك».

وقالت إكرام: «هو انتي بتتعاملي مع جوزك علي أنه متساق وفاقد الأهلية ليه كده؟! يعني هو مش شخص بالغ وعاقل والمفروض شايل مسؤولية بيت وأولاد مش هيبقي شايل مسؤولية نفسه؟! طيب هي ست مُلعب وشمال ماشي، هو بقي ايه؟ معاه شهادة معاملة أطفال مثلاً؟! أنتي مشكلتك معاه هو، وكمان مع نفسك لانك اخترتي تحملي بعد ما طلقك وراح خطب اللي لفت عليه وأنساق وراها.. واللي عمل حاجة مرة مفيش حاجة تمنعه أنه يعملها تاني ومش بس مع الست دي، لكن مع أي واحدة تانية».

وعلقت إنجي: «بصي الراجل ده ضمن وجودك فاستلمي بقي و لو سابها هيطلعلك كل فتره بقصة جديدة مع واحده جديدة عشان عارف انتي قاعده».

وقالت ليلى: «سنة و نص ؟ و حامل ؟ خدي الصدمة ان الغلط مش كله عليها معلش جوزك لو مكنش له مزاج كان حيقفل  في وشها الف باب ربنا يريح بالك و يلهمك الصواب ان شاء الله».

كما علقت علياء: «انتي الوحيدة اللي هتطلعي خسرانة في القصة دي جوزك مالوش امان كدة انتي اكيد ادرى انتي تحبي تطلقي ولا تشاركي جوزك مع واحدة تانية عشان كدة كدة هيكون في واحدة تانية».