حماتي كسفتني بسبب شعري المجعد أعمل إيه؟ والتعليقات: «جوزك معندوش دم»

كتبت إحدى النساء المتزوجات مشكلتها على موقع التواصل الاجتماعي "فيس بوك" تشكو من زوجها وحماتها بسبب سخريتهم من شعرها لأنه مجعد وقصير، ما جعلها تفقد الثقة بنفسها.

وقالت المرأة في منشورها: «بنات أنا شعرى وحش الحمدلله على كل حال بس فعلا شعرى مجعد وخفيف جدا جدا وقصير خالص وحماتي قبل كدة كسفتني بسبب شعري وانا دائما قاعدة في شقتي بالطرحة مش عارفة البس بسبب شعرى وجوزى كل لما اجيب منتج واقوله حلو يزعق معايا ويقولي كل دا نصب والبروتين دا نصب وبيقعد شوية ويرجع اوحش من الاول أنا من كان يوم عنيا غرغرت وهو بيكلمني واتمنيت الأرض تنشق وتبلعني ولا أني اقعد قدام جوزى ويبص علي شعرى ويقولي الكلام دا.. أنا كنت مكسوفة جدا».

وكانت التعليقات المفاجأة حيث واجه زوجها وحماتها هجوما من النساء الأخريات في التعليقات مع دعم تلك المرأة لتستعيد ثقتها بنفسها.

وكتبت رقية في تعليق: «ولا يهمك اي حاجه اي حاجه ملكيش يد فيها إياكي تضايقك ولا تزعلي بسببها حوشي فلوس وهاتي زيوت مغذيه للشعر والفروة وممكن تجيبي فرشاة استشوار وتجيبي سيرم يحمي من حرارة الفرشة واعملي بيها».

وعلقت سمر: «جوزك معندوش دم اكشفي وتابعي مع دكتور يقولك المناسب ل شعرك».

وقالت رحاب: «حسبي الله في أي حد يؤذي إنسان ويهز ثقته بنفسه ...يا حبيبتي ميهمكيش من كلامهم خليكي انتي واثقه في نفسك وحطي ايدك في عينهم كله خلقه ربنا هقولك ع حاجه تضحكك انا شعري اللهم بارك جميل وطويل ومسلمتش برده اتقالي ده الشعر الناعم ده أصحابه بيبقوا قرع لما يكبروا وجمالهم بيروح إنما الشعر التاني ده جميل وبيفضل زي ماهو وبتلاقيهم اول ما يمسكوا فلوس يعملو بروتين ويفردوا الشعرتين فانتي متحطيش في بالك كلام مخلوق وقوليلهم الكيرلي مفيش احسن منه وانا حلوه ومدملكه والف مين يهواني ولو عاوزه اعملي بروتين وفرحي نفسك وكبري دماغك دول عالم فاضيه والله كله خلقه ربنا يا حبيبتي وكلنا فينا حته مش كامله المهم صحتك ونفسيتك».

وقالت حنان: «حبيبتى مافيش حد كامل هو جوز حضرتك ولا حماتك لمبه يعنى منورين مافيش فيهم عيوب ؟؟ كلنا كده عندنا نقص في حاجات كتير في جسمنا أو وشنا أو الشعر انتى خليكى واثقه في نفسك اهم حاجه».

كما علقت رضوى: «كلمينى خاص هبعتلك مجموعة تحل كل مشاكل شعرك ومتبعتيش فلوسها غير لما تشوفى النتيجه ولو مش جابت نتيجه ما تبعتيش وانا واثقه انها هتجيب نتيجه باذن الله وخليكى واثقه ف نفسك احنا من صنع الخالق عز وجل».

بينما علقت غالية: «اولا دول ناس معندهاش ذوق تانى حاجه الزيوت بتقلل الهيشان وبتغذى فروة شعرك وممكن إن شاء الله بطول هاتيهم كا تغذية إما أن شعرك من النوع المجعد ممكن تجيبى منتجات للشعر الكيرلى وتعملى styling زى حاجات Cantu عشان الفرد و البروتين ممكن يكون مش احسن حاجه للشعر و لكن دا حل سريع الناس بتلجأ ليه عشان مش مجهد».