سيدة تشكو من إهمال زوجها.. ونساء السوشيال ميديا: «هو ده الحب بعد الجواز»

روت إحدى السيدات مشكلتها من خلال موقع التواصل الاجتماعي "فيس بوك" لتحصل على آراء الأخريات ونصائحهن للتعامل مع زوجها وما يزعجها منه، حيث تعاني من إهماله لها وتشعر بالوحدة والفراغ العاطفي.

وقالت المرأة في منشورها: «انا مخنوقه بطريقه محدش يتوقعها امبارح كنت رايحه فرح و ركبين العربيه انا وجوزي واغاني حلوه شغاله عمرو دياب وكدا المهم صعبت عليا نفسي اوي الأول في ايام الخطوبه كان يسمع اي اغنيه يمسك ايدي و يفضل يغني و تحسو انه ملك الدنيا كلها و ينزل استوري و يبعت ليا رسايل حب قبل مينام حاجات كتيره حلوه اووي امبارح بقي اتاكدت ان كل حاجه ماتت جواه ولا كان ف اي حاجه ولا هو حب من طرف واحد مع العلم اني متجوزه بقالنا سنتين الا كام شهر هو دا طبيعي بجد وحشني كلامه معايا و هزاره و ضحكه 24 س بقي ورا شاشه الموبيل لما بيزهق ينزل ع القهوه و طبعا مقدرش افتح بوقي علشان هو راجل و براحته والله العظيم من ساعه متجوزت لو عديت ليكم الخروجات اللي خرجتها متتعدش ع الصوابع لما بقوله زهقانه يقولي مش لسه موديكي عند امك تحسو ان امي دي دريم بارك بجد انا بقيت عطشانه حب واهتمام ودلع ادعولي».

وعلقت أمنية على المنشور: «حاسه بيكي والله المشكلة أن الكرامة ساعات بتنقح فنقول مش احنا اللي هنبدأ والدنيا بتبوظ اكتر ما هى بايظه».

وقالت أسماء: «بصى هو ده الواقع مش ذنبه انك بنيتى امال مش موجوده هو كان جر رجل وانتى وقعتى فى الفخ زينا كلنا فتعالى ضمى على اخواتك من غير ندب لانه هيتعب نفسيتك من غير داعى».

وعلقت نجوى قائلة: «حتى لو بيحبك وواخدين بعض عن حب بعد الجواز كل حاجه بتبقا مختلفه وبيبقا الحب موجود بس التعبير عن الحب بيبقا ف اى تصرف عملى ..يعني مثلا زي ما بعد ما ياكل يقولك تسلم ايدك ..أما يلاقيكي تعبانه من الشغل يقولك الله يقويكي انا عارفه انك تعبتي انهارده هو كده الحب بعد الجواز».

وقالت نهى: «ابعدو شويه افصلو من بعض روحى اقعدى عند مامتك اسبوع وبعدين هو الجواز كده كل المتجوزين عندهم فراغ عاطفي».

وعلقت رنا: «كلهم هذا الشخص في الخطوبه وبدايه الجواز حماده وبعدها بقى حماده تانى منعرفوش ولا شفناه قبل كده بيبقى روتين الحياه بقى خلاص هو ضمنك انك موجوده فيعيش عادى انتى اعملى اللى عليكى زهقانه اخرجى اتفسخى مع اولادك لو عندك اولاد او مع اخواتك قرايبك بس لمجرد الترفيه مش اكتر وفكى نفسك واتكلمى معاه كده يعنى و ربنا يهديهم كلهم».

وقالت أسماء: «اتكلمى معاه وقوليله الكلام ده هو يمكن ضغوط الحياة والمسؤولية شغلته نبهيه وإن شاء الله ترجعو زى زمان».