«جوزي محترم وهادي».. مشكلة سيدة على فيسبوك والنساء ترد: «مش عاجبنا العجب»

نشرت إحدى النساء مشكلتها على موقع التواصل الاجتماعي "فيس بوك"، حيث أثارت إلى أن زوجها محترم جدا وهادئ معها في التعامل وهو ما جعلها تعتبره رجل ضعيف الشخصية، ولكنها لاقت هجوم من النساء الأخريات أنها لا تقدر النعمة وأنه رجل محترم.

وكتبت تلك المرأة في منشورها: «انا كنت حابة أعرض مشكلتي بس من غير تريقة .. دلوقتي انا مشكلتي مع جوزي اني بحسه مش زي باقي الرجالة يعني ايه يعني مثلا مبيزعقش خالص دايما بيتكلم بهدوء وبراحة انا عارفة ان دي ميزة مش عيب، بس لما تزيد عن حدها بتبقى عيب يعني مثلا لما اقوله على حاجة او اطلب منه حاجة ويرفض بيقولها بهدوء ولما اصمم اوي بلاقيه برضو بيقولي لا بكل هدوء ويمنعني من الحاجة بهدوء، يمكن تبان ميزة بس انا بحسها ضعف في شخصيته لما بيجي يطلب مني حاجة يقعد يقولي لو سمحتي يا حبيبتي وبعد اذنك .. انا كان في بالي دايما صورة الراجل مش هقول سي السيد بالفظاعة بس برضو يبقى مثلا عصبي ويزعق بسيط وكدة علشان احس بأن هو راجل مش احنا الاتنين ستات وبنتكلم بهدوء وبعدين ساعات الاقيه من نفسه يقوم يطبخ أو يروق مثلا الحاجات دي كلها مخلياه شخصيته عندي ضعيفة وبصراحة الموضوع يضايقني ومش عارفة اعمل ايه والناس الي مرت بتجربة زي دي هتفهم أن الموضوع مش مبالغة بس في فاصل بين الهدوء وانعدام الشخصية».

قالت أحلام: «معاكي راجل محترم ودي نعمه انتي مش حساها فعلا احنا كستات مش عاجبنا العجب اعقلي واهدي».

وعلقت ابتسام: «لا حول ولا قوة إلا بالله العلي العظيم هو عشان محترم وبيساعدك يبقى ضعيف الشخصية لا إله إلا الله طلعنا منها على خير يارب».

كما علقت أمنية: «مش عارفه ارد اقول ايه فيه ناس ربنا خلقها مش وش نعمه اللهم لا اعتراض على خلقك يارب».

وقال بودي: «هو المحترم الايام دي بقى ضعيف الشخصية والله العظيم انتوا عالم بتتطبروا على النعمة لا نافع معاكوا المحترم ولا غير المحترم».

قالت سارة : «سبحان الله هو علشان إنسان محترم يبقى ضعيف عموما هو خساره فيكى ربنا رزقك بنعمة ومش عاجب».

وعلقت آيات: «لا إله إلا الله محدش عجبه حاله ولو بيزعق وبيضرب ويشتم هتيجى تقولي معنتش قدره اعيش دا انسان محترم واعقلي كده وداري على شمعتك».

وقالت سما: «لا حول ولا قوة إلا بالله رجل والرجال قليلون والشخصية مش ضعيفة دا محترم واللي بيعلي صوته ويشتم دا ضعف مش رجوله أنه يشتم ويضرب ويزعق ربنا يهديكي».