استغاثات النساء على السوشيال ميديا: «جوزي طردني أعمل إيه!؟».. وأخرى: «خطيبي شهواني!»

وضمن مشاكل اليوم التي ظهرت على جروبات النساء على موقع التواصل الاجتماعي "فيسبوك"، كانت مشكلة امرأة على خلاف مع زوجها دفعه لضربها والتعامل معها بعنف ثم طردها في الشارع، مما دفعها لكتابة منشور من أجل الاستغاثة على السوشيال ميديا.

وكتبت تلك المرأة: «أنا دلوقتي في الشارع ومش عارفة أعمل أي جوزى ضربنى ضرب غبى وكرشنى وخد بنتى على صرخة واحدة ومش معايا بطاقتى حتى ومش عارفه اروح فين وابعد عن البيت عشان الواى فاى ومعيش رصيد ولا أى حاجة وأمى ساكنه فى المنصورة وأنا فى القاهرة يعنى مسافة وماليش حد غيرها وهى معهاش نت اعمل أي دلوقتى».

وكانت التعليقات جميعها تشجعها على اللجوء لأقرب قسم شرطة وتحرير محضر بالواقعة واللجوء لعائلتها، حيث قالت أسماء: «لو في آثار ضرب، اطلعي على أقرب قسم واعملي فيه محضر وبلغي انه واخد كل متعلقاتك وكل إثباتات الشخصية بتاعتك، ربنا يلطف بيكِ وينصرك على أذاه».

وعلقت روان: «بصي بأمانه مش هزار حتروحي على أقرب قسم واعملي محضر بالكلام ده وحد من القسم يروح معاكي البيت عشان تاخدي حاجتك وبالمرة يسحلوه على القسم عشان ده مش راجل».

وقالت بوسي في تعليق آخر: «روحي القسم واثبتي حالة والجيران اكيد حتلاقي اللي يشهد طالما هو عامل راجل اوي كده روحي القسم وهما حيجيبوه تلاقيه فار قدامهم بسرعة وانتي ف حالتك ومعيطة كده».

وعلقت مونيكا: «روحي على القسم واعمليله محضر وحد من القسم يروح معاكي البيت تاخدي حاجة تعرفي تروحي بيها وتاخدي بنتك معاكي واحتياجاتكو».

وقالت نهى في تعليق: «أنا مستغربه ع الناس اللي بتقولها كلمي حد يتدخل ويحل الموضوع وترجعي بالله عليكوا ده راجل اصلا ترجعله في حد يرمي مراته في الشارع حتي لو عملت جريمه يوصلها لحد بيت اهلها ولا يرميها كده في الشارع  ده اسمه تخلف ومينفعش العيشه معاه تاني».

وكانت ضمن المشاكل على جروبات البنات أيضاً أزمة فتاة تحاول الحصول على النصيحة حول علاقتها بخطيبها، وقالت: «مشكلة قريبتي هى هتشوف الكومنتات ممكن تنصحوها هى مخطوبة وخطيبها كل لما يجى ويقعدوا سوى نظراته بتخاف منه على طول على جسمها وشكلها وبيحاول يلمسها بكل الطرق الممكنة لكن هى مش بتوافق حتى يمسك أيديها تعمل اى عشان تعرف هو شهوانى ولا لا وهل ده من ايه هى نفسها تسيبه بس ده تالت خطوبه ليها وفى ظروف كتير مش سامحه ليها تسيبه وغير كده خايفه تظلمه هو بيحب اللبس الضيق والبناطيل وأنها تلبس خلخال فى رجلها وهى طالعه عادى وأنها تلبس جيب دايقه عادى وكله مباح مباح مباح وأنها تشتغل بعد الجواز عايز كده هى رفضت كده 

انصحوها تعمل اى !!».

وقالت لها هاجر في تعليق: «تسيبه طبعا حتى لو الدنيا كلها واقفة قدامها الدنيا مش هتتهد لو سابته احسن ما تجوزه وتطلق بعد كده».

وعلقت مريم: «دايماً في مثل بيتقال في الموقف دا قعدة الخزانة ولا جوازة الندامة وألف خطوبة فاشلة ولا جوازة تكسرك طول عُمرك».

وقالت آية: «تسيبه طبعا دا مش بيحافظ عليها مش لو تالت خطوبه لو الخطوبه ال١٠٠ حتى دا بعد كده يقلعها الطرحه بقى! اوعي تخليها تكمل معاه».

كما علقت مي: «مش راجل وتسيبه طبعا وربنا يرزقها الافضل وفسخ مليون خطوبه ولا جوازه فاشله من الاخ دا».

بينما قالت رضوى: «أنا بجد بستغرب من البنت اللي تشتكي ان خطيبها شهواني ما هو دا طبيعيه الرجاله وفطرتهم اللي ربنا خلقهم عليها يا حبيبتي الموضوع مش مستاهل تفسخي الخطوبة حافظي على نفسك على اد ما تقدري طول الخطوبه وحاولي متبقوش لوحدكو كتير وعجلو بالجواز بس كدا».

ولكن علقت مريم: «دا مش راجل !! حتى لو الخطوبة العشرين فى ايه دا واحد مش بيغير على عرضه تسيبه احسن ما تجوزه وتطلق فى الاخر».