كلام ستات

نانسي ماهر: الجراح المستترة تُفسد العلاقات

الأربعاء 15/سبتمبر/2021 - 02:21 ص

عبدالله أبو الخير

حذرت الدكتورة نانسي ماهر خبيرة العلاقات الأسرية ومرحلة المراهقة، من الجراح المستترة أو المدفونة والتي قد تتسبب في خلافات وإفشال العلاقات مع الآخرين، وذلك وفقا لما كتبته على صفحتها الشخصية على الفيس بوك.

وقالت ماهر: "من أصعب أنواع الجروح هو الجرح المستتر أو المدفون، الجرح دة بيفضل طول الوقت يعذب في صاحبه وبيوصل معاه لمرحلة قلة الحيلة أنه مش قادر يقاومه أو حتى يعالجه، الجراح دي بتكون عايشة مع الإنسان وبتبقى عاملة زي الورم الخبيث بينتشر في القلب والعقل والجسم كله".

وذكرت عددًا من الأمثلة لتلك الجروح: "زوج عنده عقدة من سيطرة أمه أو حب سابق فكل مرة مراته تحاول تشرح وجهة نظرها يعتبرها بتتعامل بندية ويتهمها بحب السيطرة، أو زوجة اتجوزت وهي عارفة ان زوجها مش بيحبها وطول الوقت تحلل كل المواقف اللي بيعملها في سكة بعيدة حتى لو زوجها حبها جدا ودوافعه اتغيرت، وزوجة مكتشفة عيوب زوجها واقنعت نفسها إن عمره ما هيتغير فتفضل معذبة نفسها بتحليل أفعاله بشكل مبالغ فيه وإغراق نفسها في دوامة التوقعات واليأس".

أسباب الجراح المستترة

وأكدت "ماهر" أنه بالنظر إلى الأمثلة السابقة يمكن حصر الأسباب في الآتي:

1. الكبت والكتمان

2. الخوف من البوح او الافصاح بيها

3. الذعر من نتائج محاولة علاجها

4. المشاكل المتكررة (يعني زوجة مثلا زوجها يؤذيها علي نفس الأوتار اللي كان باباها بيلعب عليها) او (زوج يلاقي مراته بتعمل اخطاء مامته او حبيبته السابقة)

5. الضعف الكاذب.. اللي بيخلي الانسان فاكر ان مشكلته مش هتتحل

6. المثيرات الداخلية والخارجية (زي الoverthinking وتأنيب النفس المستمر او لوم الاخرين ليك واحساسك ان العيب فيك)

7. جرح واحد كبير من وقت الطفولة واصابة نفس المنطقة كل شوية

8. الإيذاء النفسي او الجسدي المستمر مع عدم وجود معين أو منقذ

9. التظاهر طوال الوقت اني تمام والدنيا حلوة.

الحل يكمن في الأمور التالية:

1. اتكلم وفضفض بدل ما تسيب نفسك ضحية الكبت

2. متخافش مفيش حد يقدر يؤذيك طول ما انت واقف على أرض صلبة

3. مفيش مشكلة ملهاش حل علشان كدة عافر وحاول

4. آمن بنفسك وبقدرتك اللي اتخلقت جواك انك تقدر تواجه وتغير

5. لما تحس انك بتلوم نفسك لازم بسرعة تجري علي حد يساعدك ويقف جنبك ويحلل معاك الموقف لان اغلب الجراح بيكون ليها جذر وأصل وبتتحل بمجرد إدراكها

6. ارجع لربنا بالصلاة والدعاء ان مشاكلك تتحل وجراحك تشفي علشان هو الوحيد القادر أنه يشفي ويعالج