نانسي ماهر: 7 أسباب لشعورك بالذنب في حق نفسك

الخميس 09/سبتمبر/2021 - 11:51 م

عبدالله أبو الخير

أرجعت الدكتورة نانسي ماهر خبير العلاقات الأسرية ومرحلة المراهقة، السبب وراء الشعور بالذنب في حق النفس إلى سبعة أمور، وذلك عبر منشور كتبته على صفحتها الشخصية على الفيس بوك.

وكتب "ماهر" على صفحتها: "تعالوا نعرف إيه اللى بيخليك حاسس بـ #الذنب في حق نفسك:

١. الاختيارات الغلط

اختياراتك وخصوصا اللي بتكون بكامل حريتك أو بمحض إرادتك بتخليك تشيل طول الوقت ذنب، وساعتها للأسف حتى لو الاختيارات دي عن غير معرفة أو وعي، بسمع الناس برضه بيحملوا نفسهم ذنب الاختيار.

٢. عدم وضع حدود

عدم وضع حدود للأذى أو للشر أنه يقرب منك أو يضايقك أو يؤذيك، إنك معرفتش تقول لا في مكانها، ولا قدرت تمنع شخص أنه يؤذيك كل دى أسباب تخليك تحس إنك صعبان على نفسك ومزعلها وكنت سبب ضمني في أذاها.

٣. ملحقتهاش

كتير بيتعذروا لنفسهم عشان ملحقوش نفسهم في الوقت المناسب، يعني حسيت بالخطر أو كنت خايف من الشخص الفلاني وبرضه مقدرتش أوقفها عن إنها تكمل أو إنها تواجه.

٤. الخوف

ناس بتعتذر لنفسها انها خافت تواجه أو ترفض وضع غلط او تنقذ نفسها من الفشل او اليأس، خوفها علي زعل غيرها مثلا، أو خوفها تخسر ناس اصلا محافظوش عليها، كلها أسباب خلتها تخذل نفسها ومتقدرش تنقذها.

٥. خسارة الطيب

الناس الكويسين اللي كانوا في طريقها أو الفرص الحلوة اللي ضيعناها بسبب تردد او خوف او الاستماع لآراء ناس مش بيحبو لنا الخير، كل دي اسباب تخليني اعتذر لنفسي ان في وقت من الأوقات ضيعت عليها فرصه بسبب استماعي الناس أو آراء غير حكيمة.

٦. الأنانية

ناس كتير بتعتذر لنفسها انها كانت انانيه وحبتها بزيادة بس بشكل غير ناضج، مكنتش بتعلمها ازاى تعتذر او تخضع أو تلين أو تلقي مرنة لما كان يقتضي الأمر سيطرة الذات عليا، واني اخليها تبلعني وتخسرني ناس بتحبني بجد علشان شايف نفسي صح دايما، برضه حاجة لازم اعتذر لها عليها.

٧. عدم وضعها أولوية

فكرة إني أضغط عليها طول الوقت علشان تنفذ اللي الناس عاوزينه أو أسيبها وأهملها ومهتمش بيها علشان مستخسر فيها وقت أو أمكانيات، كل دي تخليني لازم أعتذر لها على إساءة معاملتي ليها.

وأنهت "ماهر": "ووسط كل ده علشان محدش يفتكر إن نفسه بس اللي غاليه عليه، اعتذر لكل حد كان عايز مصلحتك بجد وانت تجاهلته، اعتذر لأقرب المحبين اللي ضيعتهم علشان ترضي ناس تانيه، اعتذر للناس اللى مرضتش تعتذر لهم علشان دلعت نفسك وسيبتها تخبط في اللي حواليها من غير حساب، اعتذر لكل اللي كان ممكن تطلب مساعدتهم أو رأيهم قبل ما تضيع فرصة أو تخسر ناس كويسة، اعتذر لكل حد جرحته أو تعبته في سكتك للنضج، اه هنعتذر لنفسنا، بس معاها هنشوف مين اللي خسِرناهم، أو خسّرناهم حاجات كتير واحنا بنفوق أو بنتعلم الوعى".

اقرأ أيضًا..