«ده مربط الفرس»| كاتبة صحفية تكشف علاقة 3 مسلسلات رمضانية بما يحدث في القدس

نشرت الكاتبة الصحفية نشوي الحوفي عبر صفحتها الرسمية على "فيسبوك"، تحليلًا للأوضاع في فلسطين المحتلة تحت عنوان «القدس وفلسطين والشياطين الحمر».

وكتبت الكاتبة بلغة بسيطة: "معلهش طول بالك معايا الحكاية طويلة شوية ولازم تفهم اللي بيحصل بهدوء عشان تعرف ايه اللي وراه، الدنيا من اسبوع ولعت في القدس والمسجد الاقصى فجأة، وبدأت قوات الاحتلال الاسرائيلي تلطش في الفلسطينيين في حي الشيخ جراح وفي المسجد الأقصى".

التعريف بحي الشيخ جراح
وأضافت أن الشيخ جراح هو اسم طبيب صلاح الدين الأيوبي حسام الدين الجراحي، كما سمي الحي الموجود في القدس الشرقية باسمه، متابعة: "وفي سنة 1956 قررت الاونروا ووكالة غوث للاجئين الفلسطينيين والحكومة الاردنية انشاء الحي ده وتسكين 28 عيلة فلسطينية تم تهجيرهم من قراهم سنة 1948 فيه. الوعد كان انهم ياخدوا صكوك ملكية لكن ما حصلش، وفي سنة 2002 بدأت تحرشات الصهاينة لطردهم من مكانهم وبناء مستوطنات مكانها وكل شوية كانت عيلة من العيلات تسيب المكان لحد ما فضل كام عيلة رفضوا وقررت اسرائيل تطردهم بالقوة، وده اللي ولع الدنيا وده مربط الفرس".

لماذا تصر إسرائيل على طرد سكان حي الشيخ جراح خلال هذه الأيام بالتحديد؟
أجابت الكاتبة الصحفية: "هنا بقى يكون تفسير الحكاية في طار ممكن تسميه "لعبة الشياطين الحمر والزرق والهباب كمان " لانها لعبة في مصالح اطراف كتيرة اوي، نبدأ بإسرائيل اللي لسة مخلصة اخر انتخابات لاختيار رئيس الوزارة وتشكيل الحكومة للمرة الرابعة خلال سنتين من 2019-2021، لأن نيتنياهو بيفوز على الحركرك ومش عارف يشكل حكومة وكل ما يعدوا المهلة يعيدوا الانتخابات ويكمل هو بحكم انه اخر رئيس وزارة!؟!! (دولة ديمقراطية جدا)، اسرائيل في مزنق داخلي بين فشل تشكيل حكومة على مدار سنتين وتهم فساد بالمحكمة بتواجه نيتنياهو وعنصرية بتاكل المجتمع الاسرائيلي وخصوصا اضطهاد اليهود الافارقة، وهنا لازم يكون في عرض خارج اطار الحكومة".

وتابعت: "ده بيتزامن مع عرض تاني كان لسة معمول مع ايران اللي اسرائيل اعلنت رفضها لاعادة الاتفاق النووي الامريكي معاها وضربت اهداف لها في الخليج واتهمتها بضرب اهداف اسرائيلية في الخليج... لكن كل ده ما سمعش وما عملش حاجة... اسرائيل بتهدد وايران تتوعد وبس..ولا حد شاف ده بيضرب ده ولا ده بيرد على ده... وهنا من مصلحة الاتنين تولع الدنيا في فلسطين المحتلة... ايران لها مصلحة في اشعال فتيل النار وهي بكبيرها حتستمر في تمويل حماس منفذ تفريغ بقائها في جزء من الهلال اللي مسمياه شيعي...ايران مصلحتها بقاء الولعة ولو راح 80 الف فلسطيني مش 80... عشان يكون في قضية..بس ايران ناسية انها عاطية لاسرائيل وعد امان تفضل قواتها على بعد 140 كم متر عن الجولان في سوريا لحماية امن اسرائيل!!!!".

حماس تخسر في معركة الفلسطنين ضد إسرائيل
واستطردت: "حماس هي كمان خسرانة والداخل في غزة بيغلي من اوضاع القطاع في ظل بطالة وكورونا ونقص طاقة وفساد ادراي مع قرار تاجيل الانتخابات الفلسطينية اللي اتوعد بيها الفلسطينيين لانهاء الصراع بين فتح وحماس.. حماس كانت محتاجة هيصة تنسي الناس اللي في غزة ما ابتلاهم به الله.. وتنادي يا قدساه بعد ما علقت صور حكام قطر وتركيا وايران في شوارعها من 2016 وقالت لك غزة تنتظر الرجال..بس الظاهر الرجال مش لاقيين مواصلات تنقلهم لهناك".

تركيا تحاول تحرير القدس
وأشارت: "تيجي بقى تركيا اللي فضلت ساكته طول اليومين اللي فاتوا لحد ما طلع اردوغان ووزير خارجيته اوغلو االاربعاء 12 مايو 2021 وقالوا لك انهم قرروا يبعتوا قوات تركية لتحرير القدس وحماية الفلسطينيين وان العمر واحد والرب واحد، (تكبير بصوت المغيبين ) هنا بقى دي لعبة كبيرة اوي تصرف بيها تركيا النظر عن ازماتها الداخلية المهببة في الاقتصاد والبطالة وفضايح الفساد لعائلة اردوغان والاهم فشل السياسة الخارجية وفضيحة ركوعهم للشروط المصرية بعد عداء صرفوا عليه فلوس الاتراك من 2011 لحد النهاردة.... لإن تركيا ما تقدرش تبعت خيال عسكري خشب للقدس لانها موقعة تطبيع مع اسرائيل من 2016، ده غير اتفاقيات المصالح بينهم من سنين... لكن اسرائيل ممكن تسمح لها باداء على المسرح عشان هم دافنينه سوا من سنين؟؟؟؟
يعني ايه؟".

وأردفت: "أقولك حتلاقي مع البوست لينك لجريدة زمان التركية اكبر صحف تركيا وهي عاملة موضوع عن الشرق الاوسط ما فيش فيه حاجة اسمها فلسطين من اساسه -لكن اسرائيل وبس... ثم ان تركيا وايران كانوا اول دول اسلامية اعترفت باسرائيل سنة 1949 وبينهم مصالح كتير اووووووي في السر والعلن. لكن فيه جزئية كمان مهمة... التلاتة ماضيين مع اثيوبيا اتفاقية من سنة 1959 اسمها الطوق والحزام في اطار استراتيجية بن جوريون لحصار مصر اسمها شد الاطراف... يعني اسرائيل تجمع الاطراف اللي تشد بيها مصر... اتفرج على الخريطة عشان تعرف قصدي".

وأضافت: "وزير الخارجية التركي بيقولك انهم قدموا طلب للأمم المتحدة ضد اسرائيل من كام يوم ما ايديتهومش من الدول العربية غير اليمن رغم اللي هي فيه!!! وطبعا رفضته امريكا...يا حرام
يعني ايه برده؟، يعني العملية مكتوب لها تفضل والعة كام يوم في ظل تصريحات حماس من عينة: استهداف موقع للغاز الاسرائيلي في المتوسط، وتصريحات لاسرائيل من عينة: احنا بنضرب مخازن السلاح والصواريخ (اللي ما بتعورش) اللي في غزة، وتصريحات اثيوبيا من عينة: احنا بندعو دول حوض النيل للاجتماع لاعادة تقسيم حصص مياه النيل بينهم".

الدور المصري في قضية حي الشيخ جراح
وتابعت: "كل ده ومصر ثابتة على مبادئها من غير مزايدة لأنه عارفة اللي بيحصل وحافظة دورها وامنها الاستراتيجي اللي بيعدي للعراق وسوريا مش بس فلسطين....وفاهمة ان رسايل الدراما في رمضان في(اختيار -والقاهرة كابول- وهجمة مرتدة) وصلت واتقرت وبيحاولوا يردوا عليها، ومن هنا تم إرسال وفد مصري في تل ابيب بيحاول ينزع فتيل الازمة، وفتح المستشفيات المصرية لعلاج المصابين الفلسطينيين، وفتح معبر رفح لعبور المواد الغذائية والمصابين، والثبات على موقفها في قضية نهر النيل..حصتنا خط احمر، ما باحبش المزايدات ولا الخيانة في التاريخ...عارفة ان بلادي هي اللي دفعت دم شهيد وحمت قضية اصحابها قبل اي حد هم اللي باعوها وتاجروا بيها ووقفت صفقة القرن ورفضت تهويد القدس ورفضت تشكيل ناتو عربي بعضوية اسرائيل".

اقرأ أيضًا.. أحمد عمر هاشم يطالب الحكام العرب بإنقاذ القدس