بقلم نهى الطالونى : الوجع الصامت

إرهاااااااق… بسسسسس.

عارف لما تبقى بتعافر علشان تعدّي يومك، مش علشان مبسوط… ولا علشان عندك طاقة… لكن لمجرد إنك لازم تعدّيه؟

تصحى الصبح وأنت مش عايز غير إن اليوم يعدّي على خير، وتحاول تجمع نفسك حتة حتة، وتقول: هعدّيها… هتعدّي.
لكن كل حاجة حواليك كأنها متفقة عليك… كل الظروف بتشدك عكس اتجاهك، وكل موقف بياخد منك حتة، لحد ما تكتشف إنك بقيت بتكمل اليوم بآخر ما تبقى منك.

عارف لما تبقى حلفان إنك مش طالب حاجة من الدنيا؟
لا فلوس زيادة… ولا حياة مثالية… ولا حتى سعادة كبيرة.

كل اللي نفسك فيه إنك تعيش مرتاح.
تنام وإنت مطمّن.
تصحى من غير ما يكون قلبك مقبوض.
تتكلم من غير ما تتحسب عليك كل كلمة.
وتلاقي حد وجوده في حياتك يطمنك بدل ما يخوفك.

لكن لما تفضل فترة طويلة عايش في قلق، وضغط، وخذلان، ومشاكل مابتخلصش… بييجي وقت تكره فيه حتى الإحساس اللي جواك.

تبقى مش قادر تفرح، ومش قادر تزعل، ومش قادر حتى تشرح إنت مالك.

مجرد مُرهَق.

مرهق من كتر التفكير.
مرهق من كتر التحمّل.
مرهق من إنك دايمًا مضطر تبقى قوي، حتى في الوقت اللي نفسك فيه تقع وتقول: أنا خلاص مش قادر.

وأصعب حاجة مش إن الحياة تكون تقيلة…

أصعب حاجة إنك متلاقيش حد يهونها عليك.

حد تشيل معاه، مش حد يشيلك فوق اللي شايله.
حد لما الدنيا تضيق عليك، تروح له فتلاقيها وسعت شوية.
حد يسمعك من غير ما يحكم عليك، ويطمنك من غير ما يقلل من وجعك، ويمسك إيدك من غير ما يسألك إنت وقعت ليه.

منتهى اليأس إنك تفضل تدور على الأمان في المكان اللي المفروض يكون أمانك… وتكتشف إنك محتاج تهرب منه علشان تعرف تتنفس.

ومع الوقت، بتبدأ تفهم إن الإنسان مش بيتهد مرة واحدة…

الإنسان بيتهد من تراكم الحاجات الصغيرة.

كلمة وجعته وسكت.
موقف كسره وعدّاه.
خذلان بلعه.
خوف خبّاه.
دمعة مسحها قبل ما حد يشوفها.
ومرات كتير قال: أنا كويس… وهو أبعد ما يكون عن كلمة كويس.

لحد ما ييجي اليوم اللي يبقى فيه كل اللي جواه بيصرخ:

كفاية.

كفاية إني أفضل أقاوم لوحدي.
كفاية إني أبرر تعبي.
كفاية إني أستحمل علشان خاطر ناس مش حاسة أصلًا أنا بستحمل إيه.
كفاية إني أضحك وأنا من جوايا منهك.

الخلاصة؟

مش كل شخص ساكت يبقى بخير.
ومش كل شخص بيضحك يبقى مرتاح.
ومش كل شخص بيكمل طريقه يبقى الطريق سهل عليه.

في ناس كل إنجازها الحقيقي كل يوم إنها قدرت تقوم من السرير وتكمل.

وعشان كده، لما تلاقي إنسان مرهق… متزودش عليه.
لما تلاقي حد اتغير… متسألوش ليه بقى كده، اسأله إيه اللي حصل له.
ولما تلاقي حد بيقولك أنا تعبت… صدقه.

لأن ساعات الإنسان مش محتاج حلول، ولا محاضرات، ولا نصايح…

محتاج بس حد يقوله:
أنا شايف تعبك… ومش هسيبك تشيله لوحدك.

يمكن الجملة دي، في وقتها، تنقذ إنسان من يوم كان تقيل عليه أكتر مما تتخيل.