رحل عن عالمنا أمس الفنان تامر ضيائي حيث أعلن خبر الوفاة الفنان عمرو عبد العزيز، عبر صفحته الرسمية وكتب: كدا يا تامر تمشي فجأة كدا وتخضنا كلنا لا إله إلا الله، الله يرحمك يا حبيبي ويجعل مثواك الجنة.

وقد كشف نقيب الفنانين أشرف زكي عن تعرض الفنان تامر ضيائي لحادث غدر، مشيراً إلى أن وفاة تامر ضيائي جاءت بعد تعرضه لحادث اعتداء من أحد الأشخاص، حيث كان بصحبة زوجته التي تعالج من السرطان، ويجري التحقيق في الحادث في قسم شرطة التجمع الأول.

وصية تامر ضيائي

وتفاجئ الجمهور بعد خبر وفاته أنه كتب وصيته في مايو الماضي،عبر صفحته الشخصية "فيسبوك" وكتب: "بوست وصية.. هيفضل باين على صفحتي لحد ما أموت.. الحقيقة اللي كلنا عارفينها ومتأكدين منها إننا كلنا ربنا كاتب لنا إننا نموت في ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل وأنا مش عايز حد يعملها لمجرد إنها معروفة ووقتها طبعاً مش هعرف أقولها لحد. ودي وصيتي".

وتابع: صلاة الجنازة أهم من العزا وهي اللي كل ما العدد زاد كل ثوابي ما كان أكتر، فأرجوكم تصلوا عليا مش شرط تيجي العزا وياريت لو اتعمل في البيت أو مكان بسيط بفلوسه تطلعوا صدقة جارية أفضل

وأضاف: من فضلكم لم يثبت أو يتفق عليه عمل ختمة قرآن للمتوفي إنها هتوصله، بس مثبت إن الدعاء والصدقة بيوصلوا للميت، فرجاء دي بالذات بلاش وادعولي الوقت اللي هتقروا فيه جزء فضوا نفسكم واقعدوا ادعوا فيه، بلاش صدقة جارية تقليدية وسهلة ومش مستفاد بيها يعني المصاحف كتير في مصر أوي، وكل بيت فيه كتير فممكن نحط الفلوس في جامع بيتبني أو كرسى متحرك في مستشفى يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة.

وأضاف تامر أيضاٌ: دى نقطة مهمة أوي بالنسبة ليا، محدش يقول لحد بتعيط عليه ليه، ومتعيطش عشان هو بيتعذب!! الكلام ده غلط، سيبوهم يعيطوا لحد ما يطلعوا كل الشعور اللي عندهم ومفيش حاجة بتقول إن العياط معناه عدم رضا بقضاء ربنا "وأبيضت عيناه من الحزن فهو كظيم، أهم حاجة تاني هي الدعاء وبس والصدقة، من فضلكم تكثفوا الدعاء وقت نزول القبر وتتصدقوا بأي حاجة بنية إن ربنا يجعل قبري روضة من رياض الجنة ويثبتني عند السؤال لأن ده أهم وقت ليا وياريت كمان بعد ما تدفنوني تقعدوا معايا شوية و تمشوا عشان تونسوني في ليلة زي دي، الموت علينا كلنا حق وإحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء ليا عشان أبقى في سعادة لحد ما أقابلكم تانى.

وأستكمل: "اللي بيحبوني يدعولي كتير عشان لو مفيش حد يدعيلي ودي مهمة أوي أوي أوي عاوز الكل يسامحني على أي حاجهة عملتها فيه بقصد لو بدون قصد".

واختتم الراحل: "اللهم إن كثر موت الفجأة من حولي وكثر موت الشباب غفلة، ف يارب إن كنت أنا القادم فأحسن خاتمتي وارزقني نطق الشهادة عند الموت ويسّر طلوع روحي وهوّن عليّ سكراتي فإني أحب أن أرحل في هدوء وسكينة و طمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتي أليق بلقائك العظيم و إن كان لي من العمر باقي فأغفر لي ذنوبي و معاصي نفسي الأمّارة بالسوء و أعفو عني و أمحو لي كل ما يعرقل طريقي إليك و ردّني إليك ردّاً جميلاً يارب العالمين".

تعرض الفنان تامر ضيائي لجلطة في المخ

وقد أعلن الفنان تامر ضيائي في الأيام الماضية عن تعرضه لجلطة دماغية أسفرت عن نقله إلى أحد المستشفيات وذلك بمنشور عبر حسابه على موقع التواصل الاجتماعي فيسبوك.

كما تعرض الفنان تامر ضيائي في الفترة الأخيرة لحادث سير مروع أدى إلى تهشم سيارته وهو ما أثار قلق متابعيه ليخرج بعدها ويطمأن جمهوره مؤكداً أنه بصحة وسلامة ولم يصبه شيء.

اقرأ ايضا|

محمد فؤاد يصاب بجلطة في الوجهه بعد خطوبة ابنته