مشكلتك لها حل | جوزي عايش في الخليج مع مراته وأنا بخونه هنا

مشاكل كثيرة ومتنوعة تمتلئ بها البيوت المصرية، فلا يخلو أي منزل من المشاكل، وهناك مشاكل قوية وشديدة يمكنها أن تقضي على استقرار الأسرة، وأخرى بسيطة يمكن التغاضي عنها أو حلها بكلمات بسيطة، للوصول في النهاية إلى حالة من الهدوء والسكينة بين أطراف المشكلة.

وقالت بطلة قصة اليوم: "أنا متجوزه من 13 سنة، وجوزي متجوز واحدة تانية وعايش معاها في الخليج بقاله 7 سنين مفيش بيننا غير مصروف البيت، أنا شايلاه من حساباتي من زمان وعايشة على ذمته بس علشان المجتمع وأهلي واولادي وعلشان يصرف عليهم بالمعروف وفي دماغي هدف بسعى لتحقيقه هو إني أؤمن مستقبلي أنا وأولادي ماديا وبعدين اتطلق منه أو اخلعه وأشوف حالي".

وأضافت: "من سنه تقريبا القدر حط في طريقي شخص شوفته وقتها نموذج للراجل كامل الأوصاف، هو ده اللي حلمت بيه واتمنيته فعلا، هو متجوز وعنده أولاد بس فهمني إنه عايش معاها بس علشان الأولاد واني ممكن اعتبره متجوزها على الورق فقط زي ما أنا كمان متجوزة جواز على ورق".

وتابعت: "حسيت إن هو ده الحلال وهو ده اللي لازم أقابل بيه ربنا كمان وقولتله حرفيا الجواز عمره ما كان ورقه الجواز هو كل الحب والألفة اللي بيننا، الجواز هو أنا وأنت عاوزين بعض أيوه الجواز مش ورقه".

وواصلت: "بصراحه كنت بفلسف خيانتي لجوزي ولعهد وحدود ربنا وبعد ما حصل بينا كل حاجه سابني وقالي إننا كنا مجرد حالة حلوة في حياة بعض وخرجني من حياته بمنتهى الرخص والخسه وانعدام الضمير من غير مقدمات".

وأكملت: "أنا عارفه إني غلطانه بس اقسملك وقتها ما كنت أعرف إني بغلط من كتر ما شوفت إنه حقي، حبي له خلاني عامية ومش عارفة أفرق بين الصح والغلط وبين الحلال والحرام".

واستطردت: "قلبي قايد نار و بدعي عليه ليل نهار يبتليه ربنا باللي في قلبي خصوصا إني كنت في حالي وهو اللي جري ورايا لحد ما وقعني وحبيته بجنون، ودلوقتي لا قادرة أرجع لجوزي وأرضى بيه ولا قادرة انسى الندل ده".

وردت نهى الطالوني مسؤولة حل مشكلات القراء في "هير نيوز" عليها كالتالي..

كل اللي قولتيه وارد حدوثه خصوصا، لست عايشة لوحدها متجوزة مع إيقاف التنفيذ، من حق نفسك الضعيفة تخضع لشهواتك وبيحصل لنا كلنا أوقات يغيب فيها العقل وينسي الأصول ويتبع خطوات الشيطان.

بس عندنا كرامه نشتريها برقبتنا، اتضح ليكي إنه ندل ولسه عاوزاه؟، هتآمني له تاني؟، هتعرفي تترمي في حضنه؟، ليه المذله دي؟ ربنا قال لقد كرمنا بني آدم تقومي انتي تهينيها كده؟.

هو آنتي مشوفتيش أفلام عربي ولا إيه؟، واحد متجوز وعاوز يوصل لواحده متجوزه ويوقعها، هيقولها بحب مراتي وتعالي اتسلي بيكي شويه؟، هيقولها عاوزك شويه أجدد بيكي طاقتي علشان ارجع لأم العيال مفرفش؟.

مش نعقل كلامنا الأول طالما عاوزين حل!!!!

وجعك ده ضريبة غلطتك واحمدي ربنا إن عقابك بتاخديه في الدنيا وانسيه خالص وقطعي الصفحة القذرة دي من كتاب حياتك
أما عن حقك منه فانتي ملكيش حقوق أنتي خاينة وخدتي جزاءك انا مش هطبطب عليكي ولازم افوقك أيوه ملكيش حقوق علشان الغلطان بتسقط حقوقه بالعرف.
 
أما بالنسبة لجوزك الكل شاهد إنه عايش حياته وشرعا وقانونا أنتي حقك تنفصلي وشرعا وقانونا ملزم بمصاريف أولاده
لو متقبله فكرة جوازه وزي ما قولتي وشايلاه من حساباتك يبقي خليكي على وضعك وأهي عيشه والسلام قادره تنضف غل قلبك.

إما لو محتاجة راجل في حياتك تبدئي معاه من جديد يبقى تنفصلي بالمعروف وطبعا حقك رغم أنف الجميع، اما بقي الأخ اللي كان واخدك إستبن ده اتأكدي إنه هياخد جزائه زيك ويمكن أكتر كمان بس احتسبي.

اقولك الخلاصة

اللي بيسيبها لله بياخد أكتر ما بيتمني
متحاربيش سيبي ربنا يحاربلك