مشكلتك لها حل| كرهت الحياة بسبب أبويا.. وفكرت أخون جوزي

مشاكل كثيرة ومتنوعة تمتلئ بها البيوت المصرية، فلا يخلو أي منزل من المشاكل، وهناك مشاكل قوية وشديدة يمكنها أن تقضي على استقرار الأسرة، وأخرى بسيطة يمكن التغاضي عنها أو حلها بكلمات بسيطة، للوصول في النهاية إلى حالة من الهدوء والسكينة بين أطراف المشكلة.

بطلة قصة اليوم سيدة تقول: "عشت في بيت فاقد للحب والتفاهم والألفة والمودة، أبويا كان راجل صعب وحاد الطباع كرهني في الرجالة حرفيا، خلاني أخاف منهم، خلاني اتفنن طول الوقت إزاي أكون مصدر إذلالهم، ارتبطت وأنا في الجامعه بزميل ليا، حبيت حبه ليا وأخدت عهد علي نفسي ان قلبي ده يفضل ملكي
علشان مفيش راجل يستاهله".

وأضافت: "عقده من صغري فضلت تكبر معايا لحد الجنون، انفصلت عن زميلي ده بعد قصه دامت سنين طويلة، بصراحه كنت مستمتعة جدا وأنا وجعاه وأنا بوجع أي راجل بيقرب مني".

وتابعت: "كبرت وعقلت وعرفت إني لازم أظبط كفتي الميزان وقررت ابدأ بفكر ناضج جديد وأنسى اللي شوفته في بيت أهلي وبين أبويا وأمي، واتجوزت بعد كده جواز صالونات".

وواصلت: "اتجوزت شخص كان أسوأ من أبويا لا لا أسوأ خلق الله كلهم، شخص كداب وخاين وسليط اللسان وناكر للمعروف كان بيضربنى ويشتمني بأقذر الالفاظ بدون أي مبرر، كان نفسي اتطلق منه لكن مكانش ليا ضهر اتسند عليه ويوم ما كنت اروح لأبويا متهانه كان يطردني أنا وأولادي قدامه".

وأكملت: "وجعني وحني ضهري وكسر عيني، قررت أخونه، واقتص لكرامتي وأجيب مناخيره الأرض
جربت أعمل علاقات كتير مع رجاله كانوا يتمنوا بس ارمي عليهم السلام لكني فشلت، معرفتش أكون الست دي".

واستطردت: "دلوقتي أنا بحتقره إنه وصلني للمرحلة دي ونفسي انفصل عنه لكن الانفصال أنا مش أده خالص، أنا مش معايا فلوس ولا ليا أهل يساعدوني حتى الخبرة في مجال العمل صفر، هربي عيالي ازاي ؟ وهأكلهم واعلمهم واعالجهم منين؟".

وقالت: "حرام أعيش مع واحد لا بحبه ولا بحترمه وكمان حاولت أخونه يعني اديت لقلبي وعقلي وأخلاقي مساحه لده، اعمل إيه؟ ارضى بحالي ونصيبي ده إزاي؟".

وردت نهى الطالوني مسؤولة حل مشكلات القراء في "هير نيوز" عليها كالتالي

واضح إن تاريخك مؤلم جدا وإن والدك كان سبب إنك طلعتي شخصية مش متزنة ولا سوية بس استمرارك مع جوزك هيخلق من أولادك نسخة تانية منك، هنا فيه استحاله عشرة.

الست لما جوزها بينزل من نظرها مستحيل يستعيد مكانه ومكانته من تاني، الانفصال لو مش حل فوجودك جوه بيئه ملوثة برده مش حل، خلينا نتفق إن فيه أقدار كتير أوي نتيجتها نفس نتيجه الانفصال، زي مثلا شغله وقف فمبقاش فيه عائد مادي خلاص أو هو شخصيا عجز أو قرر هو الانفصال أو حتى مات

انتي هتدوري على حل علشان تكملي طالما مشاكلك مادية يبقي ليها حل، الانفصال في مصلحة أولادك من قبلك إنتي وده بدل ما يعيشوا ما بين اتنين يزرعوا في نفوسهم الحقد والكراهية والقسوة ويواجهوا المجتمع وهما مرضى نفسيين يطلعوا عقدهم ع الناس اللي حواليهم.

سندك ربنا مش هيسيبك لأنك رفضتي الحرام، عيشتك مع جوزك حرام والطريق التاني اللي كنتي ناوية تمشيه برده حرام، مسكينة الست اللي بتتخيل إن الحياة والسعاده في راجل، ماهو يا يبقي راجل بالمعني يا بلاش منه خالص وانتي طول ما فيكي نفس عافري في الحياة، الواحدة مننا سعادتها في يومها اللي بيعدي في سلام وبنجاح.