مشكلتك لها حل | من أب نسوانجي لزوجين أسوأ منه «عاوزة راجل»

مشاكل كثيرة ومتنوعة تمتلئ بها البيوت المصرية، فلا يخلو أي منزل من المشاكل، وهناك مشاكل قوية وشديدة يمكنها أن تقضي على استقرار الأسرة، وأخرى بسيطة يمكن التغاضي عنها أو حلها بكلمات بسيطة، للوصول في النهاية إلى حالة من الهدوء والسكينة بين أطراف المشكلة.

مشكلة اليوم لسيدة تقول: "انا دلوقتى عندي 44 سنة، عشت طول حياتي بدور على أب وسند، بدور على ضهر يحميني وحضن يحتويني، بيتنا مكانش بيت دافئ ولا مستور، ياما شوفت أبي بيهين أمي ويضربها ويخونها، كان يفرق في المعاملة بيني وبين أخويا".

وأضافت: "قصر في تعليمي وقصر في جهازي وقصر في أبوته ليا، خلاني بدور على الحضن والطبطبة في كل راجل أقابله
لا عمره صرف علينا ولا اهتم بينا ولا سمع مشاكلنا، أب نسوانجي خمورجي حشاش فيه كل العبر، كان دوره في حياتنا ياكل وينام ويرازي فينا".

وتابعت: "اتجوزت علشان أهرب من ذله لكن لسوء حظي أخدت راجل كان نسخه منه ومن طباعه المتسلطة، قاطعت أبويا وقدرت اتطلق من أبو عيالي وبقيت بتشد لأي راجل كبير في السن معرفش ليه بيغريني ويشدني الشعر الأبيض".

وواصلت: "حبيت واحد أكبر مني بـ 20 سنة واتجوزته وكان ده حبل المشنقة إللي لفيته بنفسي حوالين رقبتي مفيش تفاهم ولا تكافؤ ولا علاقة زوجية صحية، وغيرة وشك وإهانة طول الوقت واتطلقت تاني".

وردت نهى الطالوني مسؤولة حل مشكلات القراء في "هير نيوز" عليها كالتالي:

مما لاشك فيه ان حياتك بها خلل صريح وواضح، فالأب ركن أساسي ورئيسي في حياة أولاده، وأي فقدان له أو حرمان منه يعد بمثابه عاهة مستديمة، خلينا نتكلم بقانون الكون شوية، أوله إن الحياه دار ابتلاء عباره عن اختبارات بس، هقف عند جملة قاطعت أبويا، آنتي أمرا وليس فضلا واجب عليكي ونافذ بر والدك مهما عمل فيكي.

إحنا ملناش قرارات في أقدارنا وده اللي لازم تسبوعبيه وتسلمي بيه، اعتبريها صفقه (تجاره مع ربنا) هصبر واحتسب علشان أشوف العوض.. إيه رأيك؟.

استثمار للحب والسلام علشان تحصدي تمار زرعتك فيستفيد منها أولادك إن وجدوا او تستفيدي بها أنتي دنيا وآخرة، لو غذيتي عقلك بالكلام ده وارتضيتي بقضاء الله وقدره وبحظك في الدنيا هتقدري بعد كده تختاري صح، راجل يكون ليكي أب واخ وصديق ورفيق وحبيب، يكون ليكي حضن وأمان وحنان وسند وضهر.

عيدي حساباتك تاني ورتبي نفسك من شتاتها هتوصلي لكل اللي بتتمنيه، أكيد المشكله مش في والدك، المشكلة في ترجمتك للوضع اللي اتفرض عليكي.