البيوت أسرار.. كلمة نشأت عليها أجيال عديدة اعتادت على هذه الكلمة بكل معانيها، إلا أن هناك بعض هذه الأسرار والتفاصيل قد تخرج للعلن، بفعل عدم تحمل أي طرف من الزوجين إخفائها.

كما أن المشكلات الزوجية أصبحت عادة يومية أيا كانت أسبابها وتعود عليها الزوج والزوجة.

تقدمت زوجة تدعى هويدا في الـ 33 من عمرها تعيش في منطقة حدائق حلوان، للمحكمة تطلب الخلع بعد زواجها بـ 3 أعوام ولم يرزقها الله بأطفال.

الزوجة كشفت عن مشكلتها مع زوجها والتي بسببها أقامت دعوى خلع بمحكمة الأسرة بالمعصرة، وأنها طلبت الخلع من زوجها بسبب إهانته لها في ساعات متأخرة من الليل نتيجة وجبة كشري قدمتها له.

إهانة وشتائم

وقالت: "تعبت خلاص من الإهانة، كل شوية شتائم وسب وإهانة، دي مش عيشة وأنا مش خدامة أنا مفروض ست البيت، مراته لكن هو بيتعامل معايا على أني خدامة وكل شوية صوت عالي وشتائم ومفرج عليا الجيران كلها".

وأضافت، "عمري 33 سنة واتجوزت من 3 سنين، جوزي جه طلب إيدي من أهلي ووافقوا واتخطبنا وساعتها مكنش صوته بيطلع والله، لكن زي ما بيقولوا - تحت السواهي - لأني بعد الجواز لقيت بني أدم تاني خالص عايش معايا، جهزنا كل حاجة وأتجوزنا وفضل حوالي 6 شهور مفيش صوت عالي ولا خناقات، لحد أول خناقة بيني وبينه".

هويدا تابعت: "في يوم قبل ما أدخل أنام قالي جهزي الهدوم بتاعتي عشان الشغل، وجهزت له قميص وبنطلون، وصحيت الساعة 6 الصبح على صوت عالي وكانت أول مرة يتعصب وبقوله في إيه، قالي أنا مش عايز القميص ده قولتله طيب خلاص حقك عليا وهكوي واحد تاني غيره على ما تجهز بس، شتائم وإهانة ووصلة من الصوت العالي ونزل".

معاملة سيئة من الزوج

وقالت: "لما رجع البيت بالليل قولتله انت فيك حاجة في مشاكل طيب، قالي ليه مجنون بكلم نفسي قولتله طيب خلاص وقعدت حوالي 3 أيام مش بنتكلم وبعدها صالحته، وعدت الأيام وكل فترة كانت بتحصل مشكلة يفرج عليا فيها الجيران وشتائم وسب وصوت عالي جدا، وفي مرة مسح بيا الشارع قدام الناس عشان كان بيشتري تي شيرت وقولت له مش لايق عليك".

واستكملت: "بعد 3 سنين جواز، وعشان هي بتيجي على أهون الأسباب، في يوم وهو راجع من الشغل بالليل دخل يغير هدومه وخرج، بيسأل هناكل إيه، قولتله عملت لك كشري أنت بتحبه، قالي كشري إيه اللي هاكله هو أنا مش مديكي مصروف، مش واكل وفضل يشتم ساعتين وصوت عالي لحد ما واحدة من الجيران خبطت وقالتله اهدى يا بني قالها ياحاجة انتي متعرفيش حاجة أنا مستحمل بالعافية وزهقت ومش عايزها، قولتله لو مش عايزني طلقني قالي معنديش طلاق، أخدت هدومي ومشيت روحت عند أهلي ورفعت قضية خلع".

اقرأ أيضا..

زوجة تطلب الخلع:« زوجي تحول إلى مجنون بعد وفاة والدته»