«رزعك شاكوش على نفوخك» سخرية وشماتة بنات السوشيال ميديا من زوجة حسن شاكوش

كتبت الكثير من الفتيات منشورات سخرية وشماتة في زوجة المطرب حسن شاكوش، بعد طرده لها وتحرير محضر ضدها، وذلك بعد زواجها منه بشهرين وسجودها شكر لله على الزواج منه.

علقت نور قائلة: «ده رزعك شاكوش على نفوخك. ده اللي سجدتي عشانه أهو مسمرك ياختي».

وكتبت يارا: «هو فكر نفسه إيه فوق القانون ولا عشان مطرب مشهور الحق كل الحق مع الزوجة حتى لو كانت غلطنه».

وقالت غادة: «ريم زوجة حسن شاكوش لما سألوها في مرة عنه قالت إنه كتير عليها وبتستناه من زمان من أيام ما كانت طفلة لما جارهم وقتها، وقالت إنه أكبر منها بكتير بس مش مشكلة عشان بتحبه وإنها مكانتش تتخيل يبصلها، وعملها فرح كبير فيه كل المطربين وسجدت في الفرح يومها .. النهارده حررت محضر ضده إنه طردها من البيت بقالها كذا يوم وأخد شبكتها وايصال أمانة كانت عاملاه بديل للمؤخر واستولى على المنقولات ! ».

وتابعت: «الجواز مش مجرد حد معاه فلوس هيعملنا فرح كبير ونسافر في كل حتة ونسكن في أكبر كمباوند، ولا مجرد حُب وخلاص من غير مراعاة للثوابت الأخلاقية في الشخص ده وهيحافظ عليا ولا لأ، والله وقتها لو كتبتي مليون قايمة ووصل أمانة مش هينفعوكي .. وحاجة كمان .. طول ما انت شايف نفسك أقل من اللي قدامك وإنه اتكرم واتفضل عليك بحُبه ليك، توقع أي حاجه منه في الآخر».

كما علقت سلمى ساخرة: «عشان السجده كان كتافها باينه عارفه لو محتشمه مكنش هيقلبها».

وكتبت هاجر: «العطاء الزيادة والامتنان المبالغ فيه بيخلي الطرف التاني يستقوى ويضمن بقائها معاه تحت اي ظروف ومهما عمل ... للأسف يعني».