بعد عرض مسلسل "تحت الوصاية" بطولة الفنانة منى زكي، ونجاحه وتأثيره في المشاهدين، علقت الدكتورة نهاد أبو القمصان، على قانون الولاية على المال بعد وفاة الأب، الذي يتحدث عنه المسلسل.

وكتبت نهاد أبو القمصان، عبر صفحتها الخاصة على موقع التواصل الاجتماعي "فيس بوك": «قانون الولاية على المال - المادة (1) للأب ثم للجد الصحيح إذا لم يكن الأب قد اختار وصياً للولاية على مال القاصر وعليه القيام بها ولا يجوز له أن يتنحى عنها إلا بإذن المحكمة، طب والام لا مؤخذة ؟ ام مين ؟ هو احنا هنغنى فى عيد الام بنقول قانون مش اغانى والقانون ما يعرفش النوع دا من المخلوقات».

وأضافت: «عارفين القانون دا اتعمل امتى ؟ اتعمل سنة ١٩٥٢ من ايام ما كانت اغلب البنات والسيدات لا بتتعلم ولا تدخل جامعة ولا تشتغل وبالتالى لا بتخرج من البيت ولا عندها خبره يعنى قانون من ٧٥ سنة بيحكم لحد دلوقتى..يخلى الام بلا اى صفة فى حياة ولادها إزاى؟ لا تستطيع تسجيل الطفل المولود او استخراج شهادة ميلاد، لو الطفل اتولد بمشكلة صحية ما تقدرش تعمله عملية جراحية او تاخد قرار مصيرى دون وجود الاب او الجد او العم».

وتابعت: «ما تقدرش تطلع لاولادها بطاقة او باسبور او قيد عائلى.. ما تقدرش تقدم فى المدرسة او تنقل من مدرسة لولادها .. ما تقدرش تشرف على اموال اولادها فى البنك ولو فتحت لهم حساب تحط فيه لكن ما تعرفش اى معلومة ولا مين سحب او هى تسحب او تستثمر لولادها .. ماتقدرش تسافر بولادها دون موافقة الاب او الجد فى غياب الاب حتى لو مسافرة للاب نفسه تحصله على شغله .. لو حوشت قرشين وجابت حاجة باسم الولاد يقدر الاب او الجد التصرف فيها دون حتى سؤالها».

واختتمت نهاد أبو القمصان: «قانون الولاية لا يعرف الامهات .. وتتساوى الام مع اى سيدة غريبة من الشارع وطبعا دا بهدل امهات واطفال وبدد اموالهم وضيع مستقبلهم .. اما بقى ست الحبايب يا حبيبة دا عند الفنانة شادية الله يرحمها اغنية موسمية فى عيد الام».

إقرأ أيضًا..