من أرشيف محكمة الأسرة| بيفرج عيالي على أفلام إباحية ويخليهم يشحتوا

وقالت آمال في دعواها: "اتطلقت من جوزي من 16 سنة بسبب عمايله السودة وإنه راجل ميتعاشرش جيبت منه بنتين وولد وأكبرهم دلوقتي عنده 20 سنة بعد طلاقي منه عملت حادثة ورجلي أتصابت فيها ومبقيتش قادرة علي الحركة ولا قادرة علي أني أخدم عيالي حتي راح هو استغل اللي حصلي وخد مني عيالي ووقتها كانوا لسة صغيرين وقالهم (هاخدكم تعيشوا معايا ومع مراتي الجديدة اللي هتشيلكم فوق راسها بدل أمكم اللي مبقيتش عارفة تخدمكم بس بشرط الي هقولكم عليه تنفذوه)".

وتابعت: "بعد ما خد مني عيالي وراح عيشهم مع مراته التانية كانت بتضربهم وتبهدلهم على أتفه الأسباب وخصوصا بناتي الإتنين وهو كان بييجي بليل قدام عيالي يفتح مواقع إباحية على التليفزيون وعلى جهاز كمبيوتر بفلاشة ولما عيالي يسألوه (إيه ده يا بابا اللي أنت بتتفرج عليه وميصحش كده) مكنش يرد على كلامهم ويقعد كمان مع مراته التانية قدام عيالي ويلمس مناطق حساسة في جسمها بشكل مش كويس".

واستكملت: "أجبر عيالي يشحتوا في الشوارع رغم أنه بيشتغل وبيكسب فلوس وكان بيلبسهم هدوم مقطعة ويمشيهم حافيين عشان الناس تتعاطف معاهم وتديهم فلوس وبالفعل كانوا بيرجعولوا في اليوم الواحد بألف وألفين جنيه ولما كانوا بناتي وهما بيشحتوا يتعرضوا لمعاكسات من الشباب في الشارع وبناتي عشان محترمين كانوا بيمشوا ومبيردوش على حد كان أبوهم بيضربهم وبيبهدلهم عشان مرجعوش بالمبلغ اللي هو عايزه ووصل بيه الموضوع كمان إنه دخل عيالي مدارس دمج وزور أوراق إنهم معاقيين ذهنيا ووداهم لدكتورة".

وقالهم "لما تسألكوا علي أي حاجة جاوبوا غلط يعني مثلا لو شاورتلكم علي الباب وقالتلكم إيه ده؟ قولولها كرسي والكوباية قولولها معلقة ولو معملتوش كده هضربكم لحد ما تموتوا في أيدي والعيال من خوفهم منه سمعوا كلامه ودخلوا مدارس دمج ومبقاش يصرف عليهم جنيه".

واختتمت: "وكلت محامي رفعلي قضية وخدت عيالي منه بالقانون ورجعوا تاني يعيشوا معايا بعيد عن شر أبوهم ورفعت قضية تانية نفقة عشان يصرف على عياله التلاتة أنا حاولت أشتغل وبقيت بعمل "كروشية يدوي" في البيت وأبيعه عشان مبقدرش أمشي علي رجلي وأشتغل برة البيت وأملي في ربنا في القانون كبير أن يجيلي حقي وحق عيالي في أسرع وقت".