بقلم آيه الشعراوي.. الهرشة السابعة

ومن أكتر المشاهد اللي استوقفتني مشهد المواجهه بينهم وكل واحد بيقول اللي في قلبه للتاني المشهد ده هتشوفه لو قعدت في أي مشكله بين اتنين متجوزين، فكرة إن كل واحد عايز "يشيل الليلة" للتاني كل واحد عايز يثبت إنه ملاك والتاني شيطان إن هو صح والتاني غلط وإنه لو غلط في مره يبقى ده كان رد فعل على غلط اللي قدامه، بتحس إنها مبارزه وكل واحد مصمم يجيب التاني الأرض. 

يفضلوا يعلو علي بعض مين شايل المسؤليه اكتر مين مضحي مين ناسي نفسه اكتر\.

عندنا بين المتجوزين مفيش ثقافه اعتراف بالغلط لا في ثقافة هعملك شماعه وهرمي عليك كل اللي بيحصل انت السبب من هنا لسبع سنين قدام محدش بيشوف انه شارك في المشكله لا دايما بنشوف نفسنا ضحية الطرف التاني.

مش شطاره أبدا إنك تقعد تتفنن في تشويه صورة شريك حياتك، مفيش حد معصوم من الغلط مفيش حد في علاقه مش بيغلط وبيكرر غلطه لو مقتنعتش بده ف أنت عايش في أكبر غلطة وهي إنك مش شايف الحقيقة كاملة، وإن أي علاقه راحت طريق مسدود فالطرفين مشتركين فالنتيجه دي.

حبوا بعض وقت الخلاف يا جماعة، بلاش النقاش يتقلب بعداوه ويتقال فيه كلام يعلم ومنعرفش ننساه "نادين وادم" اتنططو على بعض بقد إيه كل واحد ضحى وملقاش وكانت النتيجة الانفصال يمكن لو كانوا وفروا مجهود الخناقة ووجهوا الطاقه دي إنهم يلاقوا حلول ترجعهم للمسار الصح كان وصلوا لنتيجة تانية.

 

الخلاصة لو عاملت الطرف اللي قدامك على إنه خصم لازم تنتصر عليه هتنتصر عليه بس العلاقة مش هتنتصر وهتموت لكن لو اتعاملت إن العلاقه دي بتاعتكو أنتم الاتنين وكل ما تميل لازم تعملوا معركه صغيره تتحالفوا فيها وتصححوا المسار وتقويها أكتر من الأول ده اللي هيبقي أعظم انتصاراتكم والنجاح هيبقي للطرفين متحقق. 

الحياه الأسرية مليانة صعوبات وتحديات ومحتاجة مجهود جبار فمفيش داعي نعيش دا وإحنا ضاغطين بعض بالعكس استمتعوا بأي لحظه حلوة وهاونوا على بعض صعوبة الحياة.