حسن شاكوش: «اتعملي أعمال بوقف الحال والشلل والانتحار»

أكد مطرب المهرجانات حسن شاكوش، أنه تعرض لأذى كبير في حياته، وذلك بسبب الأعمال السفلية.

وأضاف حسن شاكوش: "الحمد لله لأني قريب من ربنا ما حصليش حاجة، ومش شرط علشان قريب من ربنا أني أكون بصلي، لأ أنا بقى لي كتير جدًا مش بصلي".

وتابع: "ما كانش حد دريان بيا وأنا كراجل مطرب لو فيا هموم الدنيا كلها بطلع على المسرح يضحك ويرقص ويعمل كل حاجة علشان شغله وأكل عيشه".




وعن الضجة التي حدثت عن حفل زفافه قال:" ليه باصين ليا في الفرحة اللي بفرحها، أنا كنت لاعب كورة بنام تحت المدرجات وكنت في السويس بشرب مياه تجيب فشل كلوي علشان مش معايا أجيب مياه معدنية".

واستطرد: "وربنا خلق الناس طبقات مش كل الناس طبقة واحدة وأنا مش في يوم وليلة بقيت حسن شاكوش وكان بقى لي 12 سنة بلعب كورة، وكنت بنام على الأسفلت وكان معايا كاوتش باتا بخيطه خمسين ألف مرة علشان ما كانش معايا، وعمري ما قلت لحد أديني جنيه".

وأردف حسن شاكوش: لما بشوف حد معاه بقول يمكن ربنا كرمه علشان يصرف على حد مريض عنده وأنا مش بحب أطلع وأتكلم ومش عاوز أقول والدتي عندها كانسر ومش بحب الكلام ده ولما بشيل بحط في نفسي ومش بشتكي وعمري ما اشتكيت أني موجوع أو تعبان ولكني بعيط في أوضتي وكنت حاسس إن ربنا هيكرمني.