ياسمين عز عن زوجة ميسي: ربنا نصرني ولما كسبت اترمت في حضنه وعيطت

علقت الإعلامية ياسمين عز، على تتويج الأرجنتين وقائدها ليونيل ميسي، بكأس العالم قطر 2022، على حساب منتخب فرنسا وذلك بالمباراة التي أنتهت بركلات الترجيح وأقيمت على استاد لوسيل. 

وأبدت الإعلامية ياسمين عز في تصريحات تلفزيونية عبر برنامجها "كلام الناس" المذاع عبر فضائية MBCمصر، سعادتها بتتويج ميسي بكأس العالم، مشيره إلى تصريحاتها عنه وعن زوجته أنتونيلا.

وقالت ياسمين عز: "الحمد لله والشكر لله أنا ربنا نصرني، أوعوا تنكروا إن في اللحظة اللي ميسي شال فيها كأس العالم افتكرتوني وافتكرتوا كلامي عن ميسي ومراته، وشفتوا الاستقرار والجواز بيعمل إيه". 

وأضافت ياسمين عز: "وشفتوا الست لما تكون واقفة في ظهر جوزها وتدعمه وتدلعه وتهننه وتحننه وبتاخد بالها منه وبتخليه أحسن حد في الدنيا بيبدع ويطلع أحسن ما عنده وبتخليه عنده طاقة فوق طاقته".

وأضافت ياسمين عز في تصريحاتها: "طبيعي جدا إن العالم بالنسبة لجوزها في كفة وهي في كفة.. لأن بعد الماتش من ساعة لما مسك الكأس ما سبوش من إيده إلا لما شاف مراته وخدها في حضنه وهي من كتر فرحتها وقلبها اللي كان مرفرف اترمت في حضنه وعيطت". 

وأردفت ياسمين: "أنا واثقة في اللحظة دي إن شريط كامل من الأحداث جت في دماغها ومرت قدامها، وقالت أخيرا الحلم اتحقق لأن دي أول مرة يوصل فيها لنهائي المونديال بعد ما أتجوزها رسمي، لأنه في 2014 لما وصل للنهائي خسروا لأنه ما كنش لسه متجوزها".

وأشارت ياسمين عز إلى تصريحاتها السابقة عن كرستيانو رونالدو وقالت :" الكلام ليكي يا جارة.. كريستاينو سامعنا وعارف إن كلامي هيوصله ومش هقول متابعني علشان في ناس بتتقمص". 

وسبق وإن وجهت إعلامية ياسمين عز رسالة خاصة إلى النجم البرتغالي كرستيانو رونالدو، وذلك بشأن تصريحاتها الماضية حول مطالبته بزواجه من صديقته جورجينا، حيث قالت :"أنا بدعو لستر البنت وبالجواز والدلع مش الطلاق، عايزني أقوله خليك ماشي معاها سداح مداح، بقول له مفيش أجمل من الحلال والستر، وربنا عمره ما هيكرمك من غير جواز، شوف ميسي لما أتجوز ربنا كرمه ووصل للنهائي، وربنا يهدي جورجينا أم العيال ويصلح الحال".

وأضافت: "الناس بتقول رونالدو عنده 37 سنة وعجز وهيعتزل، عجز إيه اعقلوا الكلام، مفيش راجل بيعجز يا حبيبتي معروفة، وكل سن وله حلاوته والراجل تلاقيه 70 سنة ومش باين عليه هو ربنا خلقه كدا جيناته قوية".