حوادث

«تركت عشيقها يُنفذ الجريمة ثم شغلت قرآن».. اعترافات مثيرة للمتهمة بقتل زوجها في السلام

الثلاثاء 08/نوفمبر/2022 - 10:49 م

هويدا علي

اعترفت "أيه.ف"، لم يتخط عمرها الـ25 عاماً، بقتل زوجها والتخلص منه وإلقاء جثته في مقلب نفايات، بالاشتراك مع عشيقها، لكي يخلو لهما الجو في مدينة السلام.

فرح شعبي

بدأت المتهمة في سرد اعترافاتها، فقالت: "انا اتعرفت على عشيقي في فرح شعبي، وبعدها مارست معاه علاقة محرمة، وبعد مرور 7 شهور من علاقتنا كنا اتعلقنا ببعض جدا ولا نستطيع الاستغناء عن بعض فقررت أنا وعشيقي اننا نتخلص من جوزي، وفي مرة عشيقي كان عندي وجابلي معاه كيس سم فئران وقالي خدي ده وحطيه لجوزك في الأكل عشان نخلص منه، وانا قولتله لا بلاش مش هقدر اعمل كده وكنت برمي كيس السم وبعدها جابلي كيس سم تاني وانا كنت برميه وكنت بضحك على عشيقي وأقوله اني انا حطيته لجوزي في الأكل بس معملش حاجه، فقالي انا هجببلك نوع سم فئران أقوى وجبلي بالفعل نوع تاني وانا مردتش احطه لجوزي في الأكل وبعدها قالي احنا خلاص هنحاول ننيم جوزك ونخنقه ومش هيبان انه مقتول وفضلنا نتكلم في الموضوع ده كتير لحد يوم رأس السنة".

وأضافت: "بعدها بيومين جوزي سافر الساحل مع صحابه وتركني في الشقة بمفردي أنا وأطفالي فاتصلت بعشيقي وحضر إلى الشقة ومارسنا العلاقة الحميمية ومشي تاني يوم الساعه 10 الصبح وكان معايا بناتي بس محسوش بيه وساعتها اداني كيس السم وقالي حطيه لجوزك لما يرجع من السفر بس انا رميت الكيس لتالت مره، وفي تمام الساعة الواحدة ظهراً حضر جوزي من السفر ومارس حقوقه الزوجيه معايا مرتين مرة العصر ومرة الساعه 8 مساء، في الوقت ده أحمد ابني كان في حلوان وبنتي كانت مع عمتها، وبعدها بساعتين دخل جوزي إلى غرفة النوم وعشيقي اتصل بيا قالي حطي لجوزك المنوم النهاردة قولتله حاضر وبعدها صحي جوزي وقالي اعمليلى قهوة وانا دخلت اعمل قهوة وحطيت له حباية المنوم وبعدها عشيقي كلمني وقالي أنا هاجي واخلص عليه وسألني انتي هتبقي معايا وانا قلتله لا مش هاقدر اشوفك وانتا بتعمل فيه كده وقالي ماشي انا هتصل وهجيب واحد صاحبي يخلص عليه معايا وبالفعل حضر عشيقي ومعه شخص آخر وخلص على جوزي".

شغلت قرآن

وأردفت: "بعدها لقيت عشيقي بيقولي خلاص هو مات انا هروح ارميه في اي حته وقالي انا هامشي من ناحية شركة الكهرباء في السلام، وقالي هارميه في آخر الشارع في حتة ضلمة، ولما عشيقي نزل بالجثة قفلت باب الشقة وشغلت القرآن فيها وبعدين دخلت الأوضة التانية وصحيت مريم وأنا كنت خايفه اقعد في الشقة وبعدها كلمت منال أخت جوزي وقلتلها سامح نزل من الساعه 12 ومعرفش حاجه عنه وبعدها ذهبت إلى قسم الشرطة بصحبة أحد أقارب زوجي، وتحدثنا مع ضابط شرطة، هنا لم تمر سوى دقائق معدودة وفوجئت بشخص بيقولي ان جوزك مات عثرنا عليه مقتول ومرمي في مقلب زبالة، مر يوم تلو الآخر وتم القبض عليا بتهمة الاشتراك في قتله".