وأوضحت التحقيقات تفاصيل واقعة اتهام سيدة بـقتل طليقها "م.ح"، 34 سنة، بعد تجريده من ملابسه بمنطقة المعصرة جنوب القاهرة، بعد محاولات منها باستدراجه لإقامة علاقة جنسية، حيث أرادت الانتقام من المجني عليه بعد أن طلقها وأراد الزواج من أخرى، وفقا لما جاء في اعترافاتها.

وبدموع وألم قالت والدة المجني عليه ز.ج 66 سنة أمام جهات التحقيق: "ابني كان متجوز 3 مرات وطلقهم، ودلوقتي كان خاطب بنت اسمها آية، أول جوازة ليه كنت عايزاه يتجوز بدري كان عمره وقتها عشرين سنة، وقام بالزواج من بنت عمرها 15 سنة لكن العلاقة ما استمرتش واطلقوا، بعد حوالي 3 شهور من زواجهم، وسبب الطلاق كان عشان البنت كان عندها 15 سنة وكانت مرتبطة بواحد قبل كده وكانت عايزة ترجع له فاطلقوا".

وأضافت الأم: "مر خمس سنوات على طلاقه الأول ثم قالي إن فيه واحدة اسمها ر.م  مخلفة 3 بنات من جوزها، وهو حاببها ويريد الزواج منها لأنه معجب بها، فرفضت لكن اكتشفت انه اتجوزها في شقتنا اللي في شارع الجمهورية في المعادي، وفضل متجوزها لمدة 3 سنين، وبعد كده هي حبت تطلق وابني خلف منها طفل".

واستكملت والدة المجني قائلة: "جوازة ابني الثالثة من المتهمة بقتله ص.ن، كان لابني صديق اسمه عماد كان بييجي يبات عنده في البيت أحيانا، وخلال وجوده في البيت لاحظ إن أنا جايبة لمحمود حاجات ومفروشات وأجهزة كهربائية عشان لما ييجي يتجوز، وفي مرة  نزل هو وعماد وكانت المتهمة أخت صديق ابني موجودة، وشافها ابني وأعجب بيها، وبعد يومين كلم أخوها وطلب منه إنه يتجوزها وعملوا خطوبة شهرين".

وأردفت: "طليقة ابني المتهمة بقتله كانت بتغير عليه، وكانت مهتمة بيه وبتجيب له أكل في الموقف اللي هو كان بيشتغل فيه، ومنذ الشهر الأول ليهم كان فيه خناقات ما بينهم بسبب غيرة المتهمة، وابني كان بيقول إنها بتشتمه وبتهزقه وبتطول لسانها عليه، وكانت بتفرج عليه الشارع، وهو طلقها في شهر 4 لسنة 2020 وفضلت المشاكل بينهم".

وأشارت والدة المجني عليه: "المتهمة خطفت المجني عليه أسبوع، ورجعته تاني، ولما سألتها قالتلي إنها كانت وخداه مصحة علاج مخدرات لأنه كان يتعاطى بودرة وحشيش وبطلهم، وبعدها أنا طلبت من واحدة بتعمل معايا جمعية تشوف عروسة لابني عشان المتهمة كانت تضربه وتراقبه في شغله عشان يرجع لها، فهي قالت لي إنها عندها بنت مناسبة وعرّفتنا عليها وابني أعجب بيها وحبها". 

وتحكي الأم: "المتهمة عندما علمت إنه خطب فضلت تهدده أكتر، وقعدت تبعت له رسائل تهديد بالقتل، وتبعت لخطيبته وتقعد تقولها هرمّلك بدري، وابني قال لخطيبته اعملي لها بلوك على التليفون، وكان مستني ميعاد الفرح عشان المشاكل تخلص، ويوم الواقعة كنا بنجهز شقة المجني عليه للفرح، وقال ليا أنا نازل بسرعة أقف مع صحابي شوية، وبالفعل بصيت عليه من الشباك وهو نازل لقيته ماشي ناحية محل جوار البيت، بعدها لقيت خطيبته بتكلمني على الساعة 12 بالليل، قالت لي: أنا بكلم ابنك مش بيرد واللي ردت عليا طليقته وقالت لي انتي مش هتجوزيه وأمه مش هتشوفه تاني، وأنا نزلت أجري في الشوارع بدوّر على ابني وأنا راجعة الفجر لقيت تجمع من الناس بقولهم في إيه قالولي إن فيه واحد اتقتل فعرفت إن هو ابني، وعرفت إنها استدرجته لإقامة علاقة جنسية عشان تقتله بعدها".

وروت والدة المجني عليه بحزن وألم حكاية ابنها بل وصفتها بالمأساة: إن السبب الرئيسي بوجود الخلافات بين نجلها وزوجته هو تدخل والدة زوجته في أمور حياتهما الزوجية، موضحة أن الهدف من تدخل والدة زوجته في أمورهما هو الانفصال، وكشفت: "المشاكل كلها كانت مع حماته لأنها مش طايقاهم وعايزاهم ينفصلوا".

ونوهت أم الزوج، أن نجلها لم يهتم لأمر تدخل والدة زوجته في أمور معيشتهما؛ لأنه لا يفضل الانفصال عن زوجته، لعدم إلحاق أي ضرر نفسي بأطفالهما، موضحة أن الخلافات التي كانت تنشب بين نجلها وزوجته، كانت خلافات بسيطة، قائلة: "مشاكلهم كانت عادية زي أي زوجين، لأن مراته الغيرة كانت تسيطر عليها".