رجل على الفيسبوك: «مراتي مش عاوزة تصرف على البيت».. والجمهور: «الأدوار اتبدلت»

أصبحت مواقع التواصل الاجتماعي منصة لعرض المشكلات وطلب النصيحة سواء للرجال أو النساء، فهو المكان الذي يجتمع فيه ملايين من الناس ويمكنهم التعبير عن آرائهم بحرية أو عرض مشاكلهم.

وطرح أحد الرجال مشكلته مع زوجته على موقع التواصل الاجتماعي "فيس بوك"، حيث كان يشكو من عدم مشاركتها معه في مصروفات المنزل براتبها بالكامل، وبدلا من أن يجد ذلك الرجل مساندة من الجميع له وجد هجومًا شديدا عليه من الرجال والنساء مع وصفه بالطمع.

وكتب ذلك الزوج في منشور عن مشكلته قائلا: «انا متجوز ومراتي بتشتغل فى قطاع البترول ومرتبها ضعف مرتبي مش بتصرف إلا نص المرتب بس ف البيت انا بجد متضايق جدا واتخانقت معاها عشان هيا بتستخسر في بيتنا وحياتنا ومبررها التافه انها من حقها يكون ليها فلوس متحوشة من غدر الزمن طيب ماتصرف ونعيش في مستوي أحسن، بخيلة جدا والله هيا صحيح لما احتاجت اغير عربيتي غيرتهالي ولما احتاجت فلوس ف تجديد البيت عطيتلي بس انا حاسس ان ده مش كفاية وان لسه فيه فلوس معاها انا تعبت والله مش الحياة الزوجية مشاركة !! ولا انا بيتهيألي».

علقت أميرة: «هي دي مشكله زوج ولا زوجة عشان حاسة إن الأدوار اتبدلت لا حول ولا قوة إلا بالله».

وقالت رشا: «بصراحة الله يكون فى عونك مستحمل ازاى كل ده وضاغط على أعصابك ايه انت بشر بردو دة لو بتحبك تقعدك فى البيت وتجيب المرتب ترميه فى حجرك لالا انا بجد مش قادره اصدق ربنا يكون فى عون  المدام دى والله  انها مستحمله كده وتكرم لانها سمحت تغير لك العربية وتساهم فى البيت ده كرم منها وجاى تشتكى بعد كده».

بينما علقت عائشة: «انت طماع اوى احمد ربنا انها تساعد فى غيرها لا تساعد حتى بربع مرتبها حقها طبعا تحافظ على نصف مرتبها وطبعا قطاع البترول مرتبات بسم الله ما شاء الله اتقى الله فيها».

وقالت إسراء: «هي الست دلوقتي هي اللي بتتجوز الراجل وتصرف عليه الدنيا اتشقلب حالها للدرجادي .. حسبي الله فيك انت وكل الانطاع اللي زيك».

وعلقت غادة: «مش مكسوف من نفسك عيب وحرام عليك يا راجل ازاي ترضى انك تاكل عرق ست انت ملزم تصرف عليها وماتخدش ولا مليم منها إلا برضاها واللي بتصرفه على بيتك ماهو إلا صدقة امال ربنا أعطاك القوامة ليه انت محتاج تتعرف على دينك وتفهمه روح دار الإفتاء المصرية واسأل الشيوخ يا راجل..... ده ربنا حيسأل على المال اللي صرفته على أسرتك ولا شايف انك مش بتستحق».

وقالت أسماء: «أفتت لجنة الفتوى في وزارة الأوقاف بأن الراتب الذي تحصل عليه المرأة مقابل عملها هو حق خالص لها، وليس لأحد فيه حق، ولا يجوز للزوج أن يأخذ منه شيئا إلا برضاها وطيب نفسها، فلو هى بتديك الفلوس بطيب خاطر منها تُشكر على ده لكن انت مش من حقك تطلب منها».