«الجواز في بيت عيله ناجح أم فاشل؟!».. امرأة تقوم باستطلاع على «فيس بوك»

الزواج في بيت العائلة أزمة منذ قديم الزمان تشكو منها الكثير من الزوجات، وتتسبب في الطلاق أغلب الأحيان، ولذلك طرحت إحدى النساء سؤالا للمناقشة على موقع التواصل الاجتماعي وتساءلت: «الجواز في بيت عيله ناجح أم فاشل؟».

وكانت التعليقات تدل على أن ليس جميع النساء تجمع على أن الزواج في منزل واحد مع عائلة الزوج سيئ ولا تجمع النساء أيضا على أن بيت العيلة شيء جيد يمكن أن يتم تقبله بسعادة، بل كانت الردود والآراء متباينة تكشف عن اختلاف طريقة التفكير بين النساء بشكل كبير.. 

علقت رانيا: «ناجح بالحب وان احنا نعدي لو بنحب بعض فاشل بالغيرة والحقد والغل اللهم اجمع بيوتنا انا افتقدت بيت ولدي بعد متباع من كتر مشاكل مراتات اخواتي مع امي بيت العائلة كيان ووطن الحمد لله الف رحمه عليك يابابا الحياة بعدك بقت صعبه واتبهدلنا وانا بالأخص اتبهدلت لأني بنت وبيت العيله ده زي حضن الام بس للاسف البنات بقت متفتحة وليها طلبات وبقت تعرف تاخد حقها كويس حتى لو على حساب كل الحواليا ربنا يخرجنا من الدنيا ع خير اتبهدلنا كتير فيها ومحدش بيحس بحد حتى الضحكة لو ضحكنا بقى فيها حسد».

كما علقت نهى: «هو على حسب الناس طبعا بس في الأغلب فاااااشل وخصوصا لو عايشين ف وسط ناس مابيخافوش ربنا عندهم الكذب والنفاق وتأليف الكلام عااااادى وكمان بيعلموه لولادهم أن شاء الله ربنا موجود واسمه العدل انا عن نفسي مش مسامحه اى حد منهم اذانى نفسيا ليوم الدين وان شاء الله ربنا يجيبلى حقى».

علقت أسماء قائلة: «هو زواج ناجح مع الحب وعلى حسب الناس الي هتعيشي معاهم وحسب التعامل بينكم، وكله يرجع لشخصية جوزك تفرق كتير ربنا يرزق بناتنا بالزوج الصالح يارب». 

وقالت مها: «والله حسب تقبلك للعيلة وتقبلهم ليكى وتفاهمكم لو النفوس طيب والود موصول وبتعامليهم معاملة الاهل وبيعاملوكى معاملة بنتهم والاصول دايما محفوظة والله حتبقي أحلى عيشة».

وعلقت نسمة: «الي انا اعرفه ان لازم انتي الي تحكمي العلاقة ومش بتجارب الناس لأن كله هيقول انها تجربه وحشه الا من رحم ربي في حاجه مينفعش نسأل عنها التجربة خير دليل والله ننشغل بأنفسنا واصلاحها ولا يهم اي شيء آخر فكلنا إلى الله راجعون حتي لو هي مش نجحا ينفع ننجحها بالتغافل عن كل شي وعلى اي شيء والله المستعان».

وأجابت سارة: «والله مش في كل الحالات ياما زوجات في شقق منفصله عن بيت العيله وفاشله من اول سنه وياما جوازات في بيت العيله وناجحه جدا المهم في رأيي عقل وتفكير الزوجة ومدى تحملها للمعيشة وفي الأول والآخر الجواز ده نصيب بتاع ربنا».

وقالت رنيم: «على حسب الناس نفسهم لو ولاد أصول وهيعاملوكي زي بنتهم بما يرضي الله هتحسي انك وسط اهلك وهتكوني مرتاحه جدا لكن لو عكس كدا وهيعملو مشاكل عيشي بعيد عنهم احسن واريح والكلام ليكي بردو مش هما بس وفي جميع الاحوال ربنا يصلحلك الحال ويرزقك بالي يتقو ربنا فيكي».