وكتبت الفتاة في منشورها: «جماعه بتتصرفوا إزاي لو مخطوبين وخطيبك بيلمح إنك لازم تشتغلي وتصرفي في البيت بعد الجواز؟!».

وكانت التعليقات مختلفة، حيث ترى بعض النساء أنه من الواجب في ظل ارتفاع تكاليف المعيشة أن تساعد المرأة الزوج في الإنفاق على المنزل، ولكن البعض  يرى أنها من الضروري أن تقوم بفسخ خطبتها منه وأنه شخص طماع.

وعلقت ياسمين قائلة: «بصي يا بنت الناس أي ست بنت أصول بتتجوز لو شافت أنها بعد الجواز بيتها محتاج وهي عندها الامكانية تشتغل هتعمل ده على طول من غير ما حد يطلب عشان تحسن من مستواها وحياتهم تكون أحسن، وهيكون عندها استعداد للشغل من غير تردد بس من غير ما حد يفرض عليها حاجة! بس ولاد الأصول ما بيطمعوش يا حبيبتي الطماع في خيرك ده جعان».

وقالت سمر: «أمال هو ننوس عين امه لازمته إيه يعني عايزك تبقي زوجة تنضفي و تغسلي وتعملي أكل وتحملي وترضعي و تسهري ليل بنهار وتودي وتجيبي مدارس وتساعدي في مصاريفها أكيد وتذاكري للعيال وتديهم دروس وكمان تشتغلي، ومهما تعبتي مضطرة تكملي يا إما يطلقك ما هو شارط بقى، وهو النبي حارسه وصاينه يشتغل وياكل وينام لا كتر خير أمه بصراحة قوليله اللي مش قد فتح البيوت ميدخلش بيوت الناس يا نطع».

كما علقت مي على المنشور قائلة: «بقولك ياحبييتي على بلاطة فلوسي لوحدها وفلوسك لوحدك تقبل الكلام وبقى راجل ومسؤول كان بها متقبلش يبقي إيه نخلع من دلوقتي بدل متيجي بعد الجواز تقولِّنا جوزي نطع ومش عارفه أعمل إيه معاه وبيخليني أصرف عليه ومعايا عيال ومش هقدر أطلق».

وقالت ليلى في تعليق آخر: «بتسبيه على طول لأن قرار إنك تساعدي ده مفروض يطلع منك ولو هو فعلا راجل بجد ويستاهل ومتمسك بيكي وبيحترمك ساعتها تقفي جمبه وتساعديه وتسهلوا الدنيا على بعض».

وعلقت مريم: «هي تشتغلي أوك بس تصرفي على البيت بفلوسك ليه هو ناوي هو اللي يطبخ ويغسل ويربي العيال ولا إيه!!».

وقالت آية: «ننفركش أكيد وقبل ما تسيبي قولي يااااااا أنا أرجل منك اهربي أحسن ليكي ده مفروض يصرف في بيت بالكامل إيه وجع القلب ده».

وعلقت شيماء: «بصي .. بصراحة الدنيا غليت أوي والحياة بقت صعبة لازم إنتي من نفسك تكوني عاوزة كدا ده أولا، ثانيا شغلك ده كاريرك إنتي اللي لازم تتمسكي بيه كمان وسند البنت بعد أهلها هي فلوسها لما بيكون ليكي فلوس خاصة بيكي بيبقى أحسن صدقينى، بس فالنهايه هو مكنش ينفع تيجي منه هو المفروض ده يكون قرارك إنتي».