كلام ستات

«هاتيلها جلطة».. ردود غريبة على سؤال «أجيب إيه لحماتي بعيد الأم؟»

الإثنين 21/مارس/2022 - 08:17 م

ساندي جرجس

تدور المناقشات اليوم بين النساء على مواقع التواصل الاجتماعي حول عيد الأم بشكل كبير، فالجميع يرسل تهنئة لوالدته والبعض يرسل لها الأغاني والكثير منهن يتساءلن حول هدايا عيد الأم وماذا يقدمن للأم أو الحماة اليوم من هدية قيمة.

وجاءت إحدى المنشورات من امرأة كتبت: «ما تقولوا لنا أفكار هدايا عيد الأم لحماتي لأن ده أول عيد أم ومش عارفة أجيب ايه؟».

وكانت التعليقات بعضها ينصح بشراء هدايا والبعض الآخر يتحدث عن الحماة بشكل سيئ مما دفع تلك المرأة بالرد على تلك التعليقات في تعديل للمنشور قائلة: «تعديل .. البنات اللي بتقول افقعي مرارتها أو هاتي لها جلطة لو هنتعامل مع الحما على الأساس ده يبقى ربنا مش هيباركلنا في بيت ولا في أولاد، الحما أم تانية لو اتعاملنا على الأساس ده هنرتاح في الدارين».

بينما علقت إسراء: «بصي هاتي مفرش سرير وعلبة فوط أنا عملت كده السنة الي فاتت ولسه بفكر هعمل ايه السنه دي».

وقالت شيماء: «هاتي عبايه شيك ولو مثلا بتلبس خمار هاتي خمار أو طرحه وهاتي مفرش سرير وعلبة فوط».

وعلقت زهرة: «هو احنا بنجيب في أول عيد أم دفايات أو طقم سرير، وأعياد الأم اللى بعد كده ممكن تجيبى لها مثلا عبايات بيتى».

وظهرت أفكار جديدة لهدايا عيد الأم أيضاً في منشور آخر بإحدى الجروبات، حيث كتبت إحدى النساء: «اقترحو عليا هدية عيد الأم عشان عاوزه أجيب لأمي ولحماتي...؟»

علقت أسماء: «خديها يوم نا قلتلها تعالي نخرج يوم كدا والحاجه اللي كانت بتعجبها جبتهلها».

وقالت مريام: «لو سنها مش كبير هاتلها تونيك خروج بالطرحة والشنطة ولو كبيرة عباية خروج بطرحتها وشوز وبوك شيك».

وعلقت سمر: «شوفي لو كانت محتاجه حاجه وكانت هتشتريها، ممكن حافظة سجاد أو مفرش سرير».

وتساءلت امرأة أخرى: «لو سمحتم يا بنات عايزة أفكار لهدايا عيد الأم محتارة مش عارفه اجيب ايه وكمان عايزة اجيب هدية لحماتي أول هديه اجيبها لها».

وكانت التعليقات مفيدة بشكل أكبر، حيث أشارت العديد من النساء إلى هدايا قيمة قامت بشرائها لحماتها من قبل، وقالت رانيا: «احسن هدية اللى تكون فعلا محتاجاها غيارات/ملابس بيتى /قطعة قماش للخروج/جهاز منزلى يكون عطلان تجيبى بداله/فرش الانترية أو السراير أو فوط حذاء طبى/ دى حاجات كل ست بتحتاجها والمفروض أن البنت بتبقى شايفة ايه ممكن يكون ناقص في البيت و تهادى بيه امها غير أنها هتفرح بالهدية هتحس انك حتى بعد الجواز مركزة مع بيت مامتك وشايفة ايه لازم يكون موجود لراحة ماما».

وعلقت زينب: «لو في مقدرتك هاتي خاتم دهب أو طقم صواني للميكرويف أو ميكرويف أو طقم توزيع وشنطة خروج، لو ست استايل هاتيلها شنطة وشوز أو شنطة وطرحة وبرفان».

وقالت ريم: «أول عيد أم جبتلها عباية حلوة الحقيقة وقيمة السنة دي قُلنا نجيب حاجة للبيت وماما بتعمللها طقم سرير، الحقيقة أنا مش شاغله دماغي لأني معرفش في الحاجات دي أنا يادوب اودي بس، اسألي مامتك هتعرف الانسب هما أكيد قريبين في السن وادري باحتياجاتهم كستات غيرنا».

اقرأ أيضًا..