في ظل رفض الكثير من الفتيات خلال السنوات الأخيرة لفكرة الزواج في بيت عائلة والتي أصبحت بعبعًا يخيف كل فتاة من مستقبل مليء بالخلافات والذي يكون نهايته الظلم والطلاق بالنسبة للمرأة، إلا أن أحد منشورات الفيس بوك أثبتت تغير تفكير الفتيات كثيراً.

ونشرت إحدى الفتيات تتسائل في جروب النساء على موقع التواصل الاجتماعي "فيس بوك" وقالت: «بدون دخول ف تفاصيل أتجوز في بيت عيله ولا لأ!؟».

قالت هدى: «على حسب الناس اللي هتعيشي معاهم كويسين أو لا ومش بالمكان أد مهو بالناس وصدقيني فيه ناس بينهم وبين أهلهم بلاد وبلاد وبردو بيحصل مشاكل يمكن أكتر لو كانو عايشين ف نفس البيت سوا، احكمي على العيلة والناس وحطي في دماغك أنهم هيكونوا أهلك وأهل ولادك وسندهم ربنا يهديلك الحال ويرزقك كل الخير».

بينما علقت آلاء: «حسب الشخص وعلى حسب العيله والله في ناس تتشال على الراس وناس متتقلعش من الرجل وربنا يكرمك بناس تشيلك على راسها يارب العالمين، كنت ضد الفكره بس لما لقيت نفسى وسط ناس بتحبنى غيرت الفكره دي وحبيتها».

وقالت دينا في تعليق آخر: «مش كل بيوت العيله زي بعض ومش كل ظروف الناس زي بعض مش احنا اللي نقولك».

وعلقت مروة: «محدش من حقه يحكم عليكي في الموضوع ده غيرك مش كل واحد عاش تجربة فاشلة في بيت عيله هيقولك لا على حسب الاختيار والاخلاق بتاعت البنت واهل جوزها فانتي متحكميش ع حد من رائي اللي حواليكي بيت العيله مش بيعض ولا فيه مشاكل طول منتوا بتحترمو بعض وبتخافوا ع بعض وانتي كويسه معاهم، وشايفه ناس بتتكلم ع الخدمه والكلام ده. 

مش عيب انك تعملي لحماتك حاجة قدريها مامتك وحطي نفسك مكانها انك ممكن تبقي ف يوم حما اللي هتعملي مش هيموتك ولا هيقلل منك صباع عادي بس عيشي معاهم بما يرضي الله، وربنا يكملك بالخير ليكي ويبعد عنك الشر».

ولكن قالت مي في تعليق: «ابعد حبة تزيد محبة وهتلاقيهم بيوحشوكي وهتكوني حابه تروحي تقعدي معاهم كمان، عشان الواحد يحافظ علي العلاقات عموما لازم تستقلي عشان ديما يكون في ود».

ومن جانبها علقت أسماء: «والله لو هتقدري تنزلي لمستوى تفكير كل واحد وتعرفي تكسبيهم وتكسبي قلب الصغير قبل الكبير هيبقى بيت كله ونس وحياه، انما لو هتدخلي اكنك داخله تحاربي اللي موجودين وتتنكي على اللي جابوهم يبقى بلاش خليكي لوحدك في شقة معزولة بيت العيلة مش بعبع والله الرك إنك تخلي اللي قدامك يحبك، ومن الآخر لو بتحبي جوزك هتحبي أهله وهما هيحبوكي لو بيحبوا ابنهم واتعاملي بما يرضي الله ودخلي علي قلوبهم السعادة بأي حاجة بسيطة، حتى لو هتعملي شوية فشار وتنزلي بيهم وتجمعيهم على طبقك صدقيني بتفرق ربنا يكتبلك الخير».