10 نصائح للتخلص من الأرق والحصول على نوم هادئ
البنات: «صعب أكون الست أمينة وأغسل رجل جوزي»
الأحد 19/سبتمبر/2021 - 06:47 م
أميرة عبدالفتاح
"سي السيد" "ست أمينة" ليسوا فقط أسماء شخصيات في ثلاثية الراحل "نجيب محفوظ" ولكنهم كانوا وما زالوا شخصيات حقيقة في مجتمعنا وجودهم كان له تأثير كبير في نسيج المجتمع المصري ولكن مع اختلاف الزمان تتغير وجهة نظر الناس عن تلك الشخصيات سواء كانوا من مؤيدي أو معارضين لتلك الشخصيات.
قامت «هير نيوز» بعمل تقرير عن الصورة الذهنية المكونة عن شخصية "ست أمينة" عند النساء وهل هن راضيات عن تلك الشخصية أم لا ؟
أحقق كل أحلامي وأكون أمينة
ر.عادل : لما بسمع كلمة "ست أمينة " الصورة اللي بتتكون عندي هي الست اللي بتربي ولادها ومش بتشتغل وبتكرث كل وقتها لبيتها وولادها، ممكن أكون في يوم شخصية "ست أمينة" لما أكون وصلت لكل أحلامي وطموحي وحققت كل حاجة هبدأ أقعد في البيت ومهتمش بحاجة غيره.
أقول حاضر ونعم وأنا راضية لو اللي معايا يستاهل
أ.مصطفى: الانطباع اللي أخدته عن شخصية "الست أمينة" اللي بتقول حاضر وطيب وهي مش راضية، عشان كدا أنا رافضة تمامًا أكون الشخصية دي، ممكن أقول حاضر ونعم وأنا راضية لو الشخص اللي معايا يستاهل المعاملة وبيعاملني بنفس المنطلق، وهكون رافضة تماما الشخصية دي.
محبش أكون الشخصية دي
ج.أحمد: الصورة الذهنية المكونة عندي لشخصية "الست أمينة" هي ربة البيت اللي بتجهز للراجل أكله وبتغسله رجله وتفضل تستناه لحد ما يخلص وتعامله كأنه طفل، أنا محبش أكون الشخصية دي ومكرسة حياتي لشخص ممكن في أي لحظة ميكنش موجود لأي سبب أو يزهق مني لما يلاقي أحسن .
أنا مقدرش أكون "الست أمينة"
د.مجدي: "ست أمينة " شخصية ضعيفة وخاضعة لأي أمر بيتقالها من الراجل، من المستحيل إني أتقبل تلك الشخصية مش بس إني أكون زيها في يوم من الأيام.
ت. خالد: لما بسمع اسم "الست أمينة" بيجي في دماغي الست المرعوبة من جوزها اللي بتعمل أي حاجة لإسعاد زوجها وتخاف تعمل أي حاجة من وراه حتى لو من حقها، محبش إني أكون كدا في حياتي.
ص . علي: "الست أمينة" هي الست الخاضعة تماما من دون أي رأي، اللي شايفة إنها مالهاش أي لازمة وعنصر غير مؤثر في الأسرة وأنها مجرد أداة تطبخ وتروق فقط وليست صاحبة أي قرار في حياتها ولا حياة أي فرد في أسرتها.
ولكن من وجهة نظري "ربة المنزل" مش تعريف لشخصية " الست أمينة " لأن في كتير من الستات اللي قاعدين في البيت واللي ما مشتغلوش ولا حتى متعلمين كانوا قادرين إنهم إدارة شئون أسرة كاملة وكانوا هما المحرك الأساسي للأسرة ، أنا مقدرش أكون" ست أمينة" لا في حالة إني أكون ربة منزل أو أكون سيدة عاملة لأن أمي مكنتش كدا ولا جدتي كانت كدا ومش دا اللي أنا اتربيت أو شفته في حياتي.
اقرأ أيضًا..
س.سمير: "الست أمينة" في وجهة نظري هي شخصية مقسومة لاتنين الأولى اللي واخدا بالها من بيتها وأسرتها ومهتمية بكل فرد في البيت، الجزء الثاني هي الست الضعيفة معدومة الشخصية اللي بتقبل الإهانة بشكل مستمر ومدفعش عن نفسها، وشايفة أن الشخصية الضعيفة كانت موجودة زمان بشكل أكبر من دلوقتي، أنا أحب أكون الجزء الأول من شخصية "ست أمينة " ولكن مع الحفاظ على احترام زوجي ليا بدون أي تجاوزات وأكون جزء مؤثر في حياة كل أسرتي.
