كلام ستات

خبيرة علاقات أسرية : 5 دروس مستفادة من قضية "إيفون نبيل"

السبت 11/سبتمبر/2021 - 07:06 م

عبدالله أبو الخير

أكدت الدكتورة نانسي ماهر؛ خبير العلاقات الأسرية ومرحلة المراهقة؛ أن النرجسية بحرها واسع وأنه ليس كل متعسف أو مغرور يمكننا وصفه بالنرجسية.

حيث كتبت ماهر على صفحتها الشخصية على الفيس بوك، تعليقًا على قضية البلوجر إيفون نبيل: "الرأي العام والسوشيال ميديا مقلوبين؛ بسبب قضية الـ blogger إيفون نبيل، متخيلين إزاي فرحة العروسة دي تتحول لذل ومراره وقهرة، الكلام اللي قالته في الفيديو خطير جدا".

ونصحت العطار البنات بعدما وردها تساؤلات من بنات وسيدات عن مواجهتهن ذات المشكلة بعدد من النصائح:

الشخصية النرجسية

لازم تتشخص بالطب النفسي زي ما كتبت في إحدى مقالاتي في الأهرام، عن كيفية التعامل مع الزوج النرجسي؛ النرجسية بحرها واسع ومش أي حد متعسف أو مغرور نقول عليه نرجسي، ونتصرف على هذا الأساس أبوس إيديكم البيوت بتبوظ بسبب الانطباعات وتفسير الأمور على مزاجنا.

العنف الأسري

جريمة يجرمها الشرع والدين والقانون وفكرة الاستمرار في زواج مؤسس على الإهانة والعنف دي مشكلة كبيرة لازم علاج ولازم تدخلات ولازم وقفات بلاش نستني ونسيب المواضيع تتطور على أساس إننا بنحمي ولادنا، إحنا كده بنغرس جواهم بذور السلبية والخنوع؛ لأن البنت أو الولد إلى بيطلعوا من بيت فيه عنف شخصياتهم بتواجه مشاكل كبيرة هم وشركاء حياتهم في المستقبل صدقوني، إحنا بنشوف كوارث.

تحطيم شريك الحياة

وإطفاؤه كارثة بكل المقاييس، بس إحنا بنحاول نستخدم دواير التوعية في التمسك بالحياة وتحقيق الذات بالرغم من الصعوبات اللي بنواجهها، فمهم مع الوقت الطرف المأذى، يتعلم يعيش ويعافر علشان يقدر يطلع للنور وسط كل الضلمة دي.

المساندة

هي لقت في الناس المساندة لكن في حالة زي دي مكنتش كفاية، الضرر كان أكبر من قدرتها علي الحياة.

الحلول الجذرية

هي بتقول ان وفاة والدها مخليها مكسوره وانه حاسس بضعفها، بس الست بالذات علي قد قوتها بيكون صبرها وعلي قد تمسكها بالبيت بيكون حجم القتال عندها، وعلي قد تمسكها بالحياة بتكون محاولاتها في الإصلاح محدش بيهد بيته بين يوم وليله محدش بيجري علي الخراب، علشان كدة في لحظة معينة بتبقي حياتك وحياة ولادك قصاد بيت هش.

ونصحت في النهاية:" صحتك وسلامتك النفسية والجسدية قصاد منظر فارغ قدام الناس، فساعتها بيبقي لازم وقفة وتفكير في حلول قاطعه مش مجرد تمشية حال وخلاص علشان متنتهيش بكارثة محققة.

وأنهت:" بالمناسبة لما شاب يروح يخطب واحدة بشكل وأسلوب وطريقة معينه بلاش يقرر بينه وبين نفسه انه يمسح ويشوه الشخصية دي لأن مفيش بيت سوي ولا اطفال أسوياء، اتربوا علي طرف بيحقر ويحطم التاني باستمرار".