بنات

نانسي ماهر تُحذر من «الجدار الحجري» في العلاقات الزوجية

الأحد 05/سبتمبر/2021 - 08:08 م

عبدالله أبو الخير

أوضحت الدكتورة نانسي ماهر خبير العلاقات الأسرية ومرحلة المراهقة، من أكبر المشاكل اللي بتمر بيها أي علاقة هو الإنسحاب التدريجي من العلاقة، وهو ما يعرف بالجدار الحجري، أو Stonewalling كما أسماه أبو علم العلاقات في العالم" جون جوتمان".

حيث كتبت "ماهر" على صفحتها الشخصية على الفيس بوك: "من أكبر المشاكل اللي بتمر بيها أي علاقة أن طرف ينسحب من العلاقة تدريجي عن طريق بناء ما يسمى بـ الجدار الحجري بينه وبين الطرف التاني علميا عرف الجدار الحجري ده بأنه واحد من علامات بتخلي المتخصصين يتنبأوا بنهاية العلاقة وسماه أبو علم العلاقات في العالم جون جوتمان Stonewalling.

وتابعت: "وفكرته إن شخص يحس أنه بينفصل عن التاني تدريجيًا والأشياء اللي بتسبب ده كالآتي:

الخناقات الكتير

زي الهضبة عمرو دياب ما قال "اسيبك واخسرك للأبد، ده كان ناقص تموتني"، المخ بيدي تحذير وقت الخناق مشابه لأعراض المرض الجسدي أو الوفاة، وأحيانا زي مشاكل ضغط الدم irregular Blood Pressure سرعة أو عدم انتظام ضربات القلب Cardiac arrhythmia .

وتابعت: "كل علامات تحفيز الـ sympathetic System اللي بتقول انك في خطر ومع تكرار الخناقات أو المناقشات الحادة الجسم بيعتبر نفسه في خطر والمخ بيتصرف علي هذا الأساس وبيقول العقل "اهرب"؛ ومن هنا بتلاقي حاضر، طيب، نعم بابتسامة باهتة، انسحاب تدريجي أو مفاجئ من المناقشات، محاولات لاعتبار إنك مش موجود أساسا.

اليأس من النقاش

بسبب المقاوحة أو المماطلة أو فكرة أن شخص يحس ان اللي قدامه مش هيفهم ولا هيستوعب ولا هيحس بخطئه في حقه، فبيحس إن مفيش فايده من الكلام، مرة في التانية بيوفر صحته ويبعد ويبدأ يحط طوبة فوق طوبه بينه وبين الشريك.

فاض بيه

أو ما يسمى بال Flooding ان يكون طرف جرب يقرب، مفيش جرب يبعد، مفيش فضلت احايله ميردش، وساعتها بيحس الشخص بغضب أو ظلم أو عدم أمان لإن مفيش حد بيقرب هو بس اللي بيقرب ويبذل مجهود فتكرار الأذى، النفسية بتحاول تحمي نفسها بالبعد، الأبحاث أثبتت أن نسبة الرجال اللي بتميل للفعل ده أكتر من السيدات .

الطرف الثالث

ودي أصعب مرحلة لما الشخص يلاقي إشباع احتياج أو استثمار مشاعر وعواطف برة العلاقة، هنا بيحس أنه بينفصل نفسيا وعقليا وروحيا وكتير جسديا (في الزواج) عن الطرف التاني، لأنه خلاص مبقاش شايف أي حاجة في العلاقة لمصلحته تماما.

وأنهت: "بناء الحاجز بينك وبين شريك حياتك أمر في منتهى الخطورة، ولازم منسبش الأفكار والمنظور يزود الحجارة اللي بيحطها، لأن في أحيان كتير ممكن اللي قدامك يفوق، بس ساعتها حيث لا ينفع الندم معظم محاولاته مش بتتحس ولا بتتشاف للأسف لأنها بتيجي بعد فوات الأوان.

اقرأ أيضًا..