افتتاح معرض كريستيان ديور 2024 بفعاليات موسم الرياض لأول مرة
احذري.. 5 كلمات تؤذي طفلك لا تستخدميها
الأربعاء 14/يوليه/2021 - 03:31 م
كشفت سهام حسن، أخصائية نفسية وتربوية، عن أشهر 5 كلمات موروثة ومستمرة إلى الآن تتردد على ألسنة الأمهات في تربيتنا دون أن يتنبه أحد إلى أنها خطأ كبير تؤذي نفسية أطفالنا (الذكور) خصيصاً.
ورصدت أشهر 5 كلمات مؤذية للطفل:
1- انت راجل والراجل مش بيعيط
من باب أن العياط ضعف والضعف للبنات فقط، ومش من حق الراجل يعبر عن مشاعره بالعياط والتنفيس عن غضبه وحزنه إلا بالصوت العالي أو الكلام الجارح فقط.
2- الولد ميلعبش مع البنات ولا تلعب بالعرايس دي لعب بنات بس
غلط كبير جدًّا؛ لأنه هيكبر بيكره البنات واللعب معاهم، وشايف انهم شيء مُنفر لأن طبع الأطفال التعميم، لسه مش فاهم وناضج لمعرفة الهدف من الأمر.. دا غير أن فضول الطفل بيثيره يلعب ويستكشف ألعاب البنات مش أكتر من كده.
3- مفيش راجل بيتحضن ويدلع
انشف ياض كدا متبقاش مايص، اعتقاد الأمهات والآباء أن الحضن والتقبيل بيدلع الولد وبيخليه مايص وميتحملش مسئولية غلط بالعكس ليه احتياجاته النفسية اللي محتاج يشبعها من شعور بالأمان والحنان والاحتواء زيه زي البنت بالضبط.
4- قومي ساعدي ماما في المطبخ.. طيب ما اخويا قاعد.. لأ أخوكي راجل الرجالة متعملش الحاجات دي.. دي بتاعت البنات بس
من الأخطاء اللي شاربين مُرها كلنا حاليًّا أن الست هي اللي شايله كل حاجة، حتى لو مشلولة وبتموت تقوم بردو تعمل شغل البيت والراجل قاعد مش بيشارك.. وشايفين أن المشاركة والمساعدة بتنقص من رجولته أو بتقل من كرامته.. ولم نمتثل لخير قدوة سيدنا محمد صلى الله عليه وسلم وهو يساعد زوجاته، ولم يشعر بالنقص وهو أعظم وأشرف الخلق أجمعين ولنا فيه أُسوة حسنة.
5- انت الأقرب لقلبي وسندي وضهري انت الراجل اللي هيشيل اسمي.. اخواتك مسيرهم يتجوزوا ويخلفوا عيال تشيل اسم اجوازهم مش اسمي.. الأمل فيك انت ...
التعلق المفرط بإنجاب الذكور وحبهم وتفضيلهم أكثر من البنات بيربي عقدة نفسية جوا كل واحد فيهم، واحد ديكتاتور والتانية مغلوبة على أمرها.. غير الشعور بالغيرة والحقد والتمييز ومشاعر كتير بتضعف روابط المحبة بين الأخت وأخوها.
