منوعات

«ما تعمليش في بناتك كده».. رسالة مؤثرة من نهاد أبو القمصان لدلال عبد العزيز

الجمعة 21/مايو/2021 - 10:21 م

"ما تعمليش فى بناتك كده".. رسالة مؤثرة من نهاد أبو القمصان ل

وجهت نهاد أبو القمصان المحامية بالنقض ورئيس المركز المصري لحقوق المرأة، رسالة مؤثرة للفنانة دلال عبد العزيز، دعت لها فيها بالشفاء العاجل والقدرة على أن تكون سندًا لنفسها ولبناتها.

وطالبت "أبو القمصان"، الفنانة دلال عبد العزيز، في "بوست" عبر صفحة «حكايات نهاد» علي "فيسبوك"، بألاّ تجعل بناتها يفقدون والدهم وأمهم، مناشدة الفنانة بسرعة التماسك من أجل العودة للوقوف من جديد: "الله هو المعين على الأمانة".

وتنشر «هير نيوز» نص "البوست"، الذي نشرته "أبو قمصان": "من حكايات الوجع أنا وحافظ، وسمير غانم، ودلال عبد العزيز وسمير غانم في بينا شيء مشترك قوى بينا نفس حكايتنا، شبه بعض جدا".

التشابه بين نهاد أبو قمصان ودلال عبد العزيز

وأضافت: "أنا وحافظ متجوزين من نفس المجال المحاماة والعمل العام، ودلال وسمير متجوزين بردو من نفس المجال الفن والمسرح مش ده بس التطابق بينا، دلال خطبت سمير غانم، واشتغلت معاه وكان خايف من الجواز، هي حبته وهي اللي خطبته، وقالت له أنا هتجوزك وهو كان خايف، قلقان، قالت له أنت مش هتكبر وتعجز لوحدك، أنا هكون معاك وهجيبلك ولاد يملو حياتك ويكملو من بعدك".

وتابعت: "أنا كمان قابلت حافظ في الجامعة وحبيته وخطبته وقلت له أنا هتجوزك، وكان خايف وقلقان، قالي عندي قضية أمن دولة وممكن أخد إعدام قلت له وماله أبقى مراتك وأبقى أرملتك، وهيكون لك ولاد يبقوا شبهك ويكملو من بعدك".

واستطردت: "لما كنت بسمع دلال بتقول إنها خطبت سمير كنت بحس إنها ست عارفه عايزة إيه وبتعمله ومخافتش يقول عليه حاجة وحشة لأنها عارفه إنه راجل محترم وناضج، زيي منا كنت عارفه بعمل إيه وواثقه من اختياري ومن "حافظ" إنه راجل محترم وناضج، على مدار حياتنا مسيرة واحدة، سمير غانم دخل قلب دلال وسكن فيه وعمره ما جرحه، قعد وادفى وهى لمته واديته بيت وبنات ملو حياته، سلمها مفتاح عمره بحب وعمره ما بص برا، زي حافظ أبو سعدة سكن قلبي وادفى واديته ولاد ملو حياته وسلمني حياته عن طيب خاطر، وعمره ما بص برا، عاش في بيت، استقر وعرف دفا البيوت والأولاد كنت عارفاه أكثر من نفسه، كان حبيبي وصديقي وزميل عمل ورفيق عمر، زي ما سمير غانم كان لدلال حبيب وصديق وزميل عمل ورفيق عمر وصان بيته وحبها".

رحيل سمير غانم

وأكملت: "رحيل سمير وجعني فوق الوجع، مع السلامة يا سمير، لو قابلت حافظ قوله له أنا عايشة على أمل اللقاء، يمكن أنتم مش حاسين بزمنا ولا أيامنا، وعايشين حياة أفضل فى مكان احسن، لكن احنا موجوعين بالصبر والانتظار، وبدعى لدلال من قلبي قومى يا دلال ربنا يعينك، فقدان حب عمرك صعب قوى انا عارفة حاسة بيكى قوى، بس بقولك قومى اقفى على رجلك، ارجعى لبناتك، أنا عارفه هتحسى بإيه لما تعرفى إن الغالي مشي، هتحسي زيي إنك مش عايزة تكملي".

وأردفت: "أنا زيك في لحظة حسيت أن قلبي بيقف، ماشية ورا حافظ وسعيدة أنى أمشى معاه، سعيدة بالنهاية، لكن لقيت نفسى بقول لنفسى فوقى يا نهاد، ما تعمليش فى ولادك كدا، ما تخلهمش يفقدوا أبوهم وأمهم، علشان كدا بقولك فوقي يا "دلال" ما تعمليش في بناتك كدا، فوقى وقومي أقفي على رجلك تاني، ربنا يشفيكِ وتقدري تسندي نفسك وبناتك، والله المعين يقدرنا على الأمانة، لحين لقاء الأحبة، وأمانة يا سمير سلم لي على حافظ".