كلام ستات

مشكلات الزواج «أونلاين».. فتاة: «جوزي خواف».. أخرى: «بيغير عليا من أمي»

الإثنين 05/أبريل/2021 - 05:03 م

السيدات المتزوجات

عزة ذكي

لجأت بعض السيدات المتزوجات من رواد مواقع التواصل الاجتماعي «فيس بوك»، لطرح مشاكلهن، أملًا في أن يجدن حلولًا لها في الواقع الافتراضي.

جوزي خواف

وعلى إحدى جروبات البنات، شرحت فتاة مشكلتها، قائلة: «مشكلتي إني اتخطبت لواحد كان متجوز 6 شهور بس وانفصل وحاولت أعرف كتير من طليقته أيه أسباب الانفصال ولكن رفضت جدًا أي تواصل.. المهم هو انفصل من 5 سنين ومراته الأولى اتجوزت وخلفت، ومشكلتى معاه انه دايما حاسس أنه قليل، ومن أى مشكله صغيره بسيطه يكبرها ويزعل بالأسبوع حتى لو جيت عاتبت يعتذر ويعترف انه بالغ في تصرفه بس دايما بيقولى انه خايف من فكرة الارتباط واني مش بصالحة».

وانهالت عليها التعليقات المطالبة لها بالانفصال عنه وقالت إحداهن: «حياتك معاه هتبقى جحيم، الأحسن ليكِ تنفصلي، لأن الشخص ده هيتعبك».

سيدة تشكو «زوجي بيشتم أهلي»

فيما شكت فتاة أخرى، قائلة: «متجوزه بقالي 5 سنين زوجي كان آيه في الأخلاق والأدب والذوق وأهلي ساعدوه كتير في الجواز بالذات امي لانها ست مثقفه، ومن الستات اللي يتقال عليهم وراء كل رجل عظيم امرأة مع العلم مستوانا أعلى منه بكتير ومطلبوش حاجات كتير منه شبكه فقط وكان عنده شقه قالولو اتجوز وافرشها براحتك لأننا عايشين في دوله خليجيه في بنجيب بيت صغير إيجار وبنفرش البيت ممكن بحاجات مستعمله كمان واتجوزنا زوجي كان محترم جدا مع أهلي ومع أمي بالذات وكان دايمًا في اي اختلاف بينا يقولي ياريتك زي مامتك لدرجة بتيجي عليا أوقات كنت بغير من أمي».

أضافت: «مثال في عيد ميلاده وأنا كنت لسه عروسه مكملتش شهر وعملتله عيد ميلاد في البيت ومفاجأه وجبت أهلي وصحابه وفاجأته أول ما رجع من الشغل ودا موجهليش أي كلمه نهائي، وقعد يشكر الناس ويشكر أهلي ويقولهم تعبتو نفسكو ودا كتير وانا مش شايفني أصلا كأن هما اللي عملوا كل حاجه».

وتابعت: «فجأه معاملته لأهلي اتغيرت بيدخل مع أمي في جدال في نقاشات دينية أو قصة من قصص الانبياء مثلا هو معلوماته عنها متجيش حاجه جمب معرفة أمي ويقعد يتفلسف عليها».

واستكملت: «عمري ما تكلمت عن أهله لا قلتلوا اختك عملت.. ولا أمك قالتلي كذا وعمري ماقلتلو دا ابويا كان بيعمل وربانا كويس وأمي سوت وعملت يعني عمري ما شفت نفسي عليه معرفش ليه هو فجأه بقى كدا مؤخرا بس قلتله دا كله لان أنا بطبعي بحب اسكت وأدي فرصه للي قدامي فسكت عليه سنين وواجهته وهو مش شايف نفسه أنو متغير او أنه بيعمل حاجه تضايق ولسه زي ماهو ياريت تقولولى اتصرف معاه إزاي وليه بيعاملني أنا بطريقة مختلفة عن الناس بخل مشاعر وبخل فلوس وعدم تقدير لكن بره الاحترام والكرم كله والذوق واللسان الحلو».

ونصحتها فتيات بالانفصال حيث انه لن يتغير مع الزمن: «يختي سيبيه أكيد شايف ليه شوفة تانية، هي الرجالة كدة».