أماني بعد 3 أيام جواز تطلب الخلع: «اتهمني في شرفي»

«اتهمني في شرفي، بيقولي إن عيني من صاحبه، 3 أيام جواز وبيقول عيني من صاحبه، لا يمكن يكون شخص عاقل»، وقفت "أماني" تصرخ أمام محكمة الأسرة بالتجمع الخامس وهي تطلب الخلع بعد 3 أيام من زفافها على "ماجد".

أماني بعد 3 أيام جواز تطلب الخلع

البداية كانت بدخول ماجد منزل أماني لطلب يدها للزواج، حيث أثنى الجميع بلا استثناء على أخلاقه، الأمر الذي جعلها توافق على الزواج منه، بجانب أنه ميسور الحال وعائلته لها أصل طيب «أيام الخطوبة كنت فعليا بعاني معاه، بس كنت بحاول أتغاضى عن عيوبه مقابل الصفات الكتير الحلوة اللي فيه، بس مشكلته الوحيدة تصميمه على رأيه، ولما حكيت لأهلي قالولي هيتغير ويلين مع الوقت، بس الوقت ده مجاش».

أماني بعد 3 أيام جواز تصرخ أمام محكمة الأسرة

«أول مرة في حياتي أندم إني سمعت كلام أهلي،  كنت بعاني بسبب الضغط العصبي اللي سببهولي، كان ممكن يتناقش 5 ساعات في نفس الموضوع، عشان يثبت إنه صح وأنا غلطانة»، لتكتشف الزوجة أنه ليس متعنتًا فقط لرأيه ولكن أيضًا شكاك، فقد قضت ليلة عرسها تقنعه أنها لم تنظر لصديقه، وليست معجبة به، وحاولت بشتى الطرق بأنه زوجها وهي تحبه، ولكن هيهات.

أماني توضح أسباب طلبها الخلع

الصديق لم يفعل أي خطأ ليشك الزوج بعلاقتهما، فقد جاء ومد يده صافح العريس ومن بعده العروس، لينظر إلى زوجته بعدها نظرة مليئة بالشر «روحنا البيت الساعة 12 وفضل هو يتخانق معايا لــ4 الفجر، وكل ده مقتنع إني ابتسمت لصاحبه ومعجبة بيه، تعبت من المناقشة معاه، نمت في مكان تاني، وتاني يوم لقيته بيخبط على الباب وبيقولي قومي كلمي أهلك بره، ولما غيرت هدومي وخرجت اكتشفت إنه اتصل بيهم وشككهم في أخلاقي، وقتها فضلت أعيط وطلبت أروح معاهم بس هما رفضوا بسبب خوفهم من كلام الناس».

اقرأ أيضًا.. كريمة لـ محكمة الأسرة: «جوزي عاوز يحرمني من التعليم»

«3 أيام جواز، 3 أيام بيعاتب فيا على ذنب معملتوش، اتأكدت إنه مش مجرد شكاك ده مريض نفسي، وبعدها قررت إني أهرب قبل ما أموت، وصرخت فيه وفي كل اللي حواليا إني مش هعيش، معاه»، لتهرب الزوجة لمحكمة الأسرة وتقيم دعوى خلع، وبالفعل تم تحديد جلسة أمام مكتب التسوية للنظر فى محاولة الصلح أو تحديد جلسة لها أمام قاضى المعارضات ليحكم لصالحها.