حكايات ومواقف «غريبة جدًا» للفتيات قبل حفل الزفاف

مواقف غريبة تتعرض لها الفتيات في الساعات الأخيرة قبل حفل زفافهن، سواء في الكوافير أو حتى نسيان بعض أشيائهن الضرورية، ولا تخلو جروبات الفتيات من «كلام الستات»، حول أغرب المواقف التي تعرضن لها؛ إذ طرحت فتاة تدعي آلاء أحمد «احكولنا يا بنات أيه أغرب المواقف اللي اتعرضتي ليها قبل فرحك بساعات؟»، لتنهال عليها آلاف التعليقات من زوجات يروين تجاربهن مع المواقف.

وأكدت مايا عباس، أنها تعرضت لسرقة أموالها الخاصة بليلة الحنة، قائلةً « أبويا راح قبض الفلوس من البنك، ودي فلوس ليلة الحنة، يعني الفراشة والكوافير والدي جي، وفجأة وهو راجع حد سرق منه الفلوس في المواصلات، واكتشف ده بعد ما وصل البيت، يومها كنت هتجنن، دا بيحوش الفلوس علشان الليلة دي، فضلت أعيط كتير بس قولت: الحمدلله إنها جت كدة وخلاص وفوضت أمري لربنا، معداش ساعات، إلا لقيت خالي جايبلي نقطة بمبلغ كبير قولت دا ربنا مش رايد يكسر فرحتي».

وقالت فتاة تدعي نونة محمد: إنها تعرضت لفقدان فستان زفافها خلال ذهابها للميك آب أرتيست، وتابعت «نسيت فستان فرحي وأنا رايحة للمكب آب أرتيست بتاعتي، كنت جايباه من أتيليه وللأسف نسيته من لبختي في البيت وبيني وبين المكان كتير، ومكتشتفش إلا بعد ماخلصت الميكب وخلاص هلبس، قعدت أعيط بوظت الميك آب وكلمت البيت بعتولي حد بيه، بس اليوم ده اتأخرت على الفرح وجوزي كان واقف برة بينفخ وأنا متوترة جدًا».

هبة: «دبلتي أتسرقت وبكيت وأنقهرت»
بينما روت هبة عبد الباري، ما وصفته بأحزن موقف في حياتها قائلةً « بعد 3 سنين ارتباط ومرمطة دبلتي اتسرقت وبكيت وانقهرت، كنت قلعت دبلتي في بيتنا ونسيتها وطبعًا أيام الفرح دي بيبقى فيه ناس كتير جدًا، وجيت أدور على الدبلة يوم الدخلة ملقتهاش، وقتها حسيت إن شقى عمري وحب عمري راح وقلت ربنا بيقولي الرباط ده مش هيبقى الصح، وفي لحظة ما كنت بعيط جوزي جه، وخدني في حضنه وقالي فداكي مليون دبلة».

روان: « بنت في الكوافير سرقت فلوسي»
وأضافت روان عمران، قائلةً « بنت في الكوافير سرقت فلوسي، حطيت شنطتي وفيها فلوس الكوافير وفلوس تانية، وفجأة جاية أحاسب ملقتش الفلوس، عملت مشكلة لأن الفلوس كانت معايا لما وصلت الكوافير، وأنا بعمل مكياج فتحت الشنطة كنت باخد منها حاجات وصاحبة الكوافير شافت الفلوس، ولما عملت مشكلة والست زعقت فعلًا، اكتشفنا إن بنت من العاملين هي اللي سرقت الفلوس».